Анлайн-дадатак да газеты
"Народная Воля"

6:00 2 студзеня 2017
20
Памер шрыфта

Сталічныя гарадскія ўлады на пяць дзён зрабілі для людзей сталага веку бясплатны праезд у метро, а таксама на асобных маршрутах трамвая і аўтобуса, але чамусьці пастараліся схаваць гэты сюрпрыз.

На гэтым тыдні ў рэдакцыю звярнуўся чытач газеты і распавёў гісторыю:

“Жонка прыехала з горада дадому і кажа, што з 20 па 24 снежня праезд у метро для пенсіянераў бясплатны. Але асабіста я не чуў пра гэта ні па радыё, ні па тэлебачанні, хаця пастаянна слухаю апошнія навіны. У гарадскім транспарце таксама ніякіх аб’яў з гэтай нагоды не робіцца. Атрымліваецца, што, з аднаго боку, пенсіянерам зрабілі падарунак, а з другога — тых жа транспартнікаў, што называецца, “жаба душыць”. Не хочуць губляць прыбытак, а таму для іх, напэўна, лепш, каб пра бясплатны праезд ведала як мага менш людзей”.

Як аказалася, бясплатныя льготы на праезд у метро, трамвайных маршрутах №№3, 6, 11 і аўтобусных №№19, 100 маюць пенсіянеры з 20 па 24 снежня (уключна) у сувязі з тым, што ў гэты час у Палацы мастацтва на вуліцы Казлова, 3 праходзіць выстава “50 плюс”.

На сайце Мінгарвыканкама гаворыцца, што наведвальнікі выставы атрымаюць кансультацыі юрыстаў, псіхолагаў тэрытарыяльных цэнтраў сацыяльнага абслугоўвання, урачоў, але пра бясплатны праезд – ні слова.

На наступны дзень пасля таго, як ільготы пачалі дзейнічаць, вырашыў даведацца, ці ёсць інфармацыя пра гэта ў метрапалітэне. Нуль!

У касах, дзе прадаюць жэтоны і праязныя, толькі паціскалі плячыма: “У супрацоўнікаў метро ўдакладняйце, мы да іх не адносімся”.

На станцыі метро “Малінаўка” супрацоўніца  метрапалітэна распавяла, што і сама толькі даведалася пра гэтае новаўвядзенне, калі прыйшла на працу. “Ніхто папярэдне нас не інструктаваў”, – дадала яна.

Тая ж самая сітуацыя і на станцыі метро “Кастрычніцкая”, і на “Купалаўскай”…

“Мы не ведаем, чаму не інфармуюць пенсіянераў, што ў іх у гэтыя дні бясплатны праезд”, – шчыра прызналіся супрацоўнікі метро.

“Першы раз чуем пра бясплатны праезд”, – здзіўляліся людзі пенсіённага ўзросту на вуліцы і шчыра дзякавалі за інфармацыю.

Цікава, што льгота дзейнічае толькі ў тым выпадку, калі чалавек пакажа пенсіённае пасведчанне. Але ж калі не ведаць пра яе, то і пасведчанне не кожны возьме з сабой.

Я патэлефанаў на “гарачую лінію” Мінскага метрапалітэна, і вось што распавёў яго супрацоўнік:

– Ёсць працоўны план па правядзенні 6-й сацыяльнай выставы для людзей сталага веку “50 плюс”. У адпаведнасці з гэтым планам і зрабілі бясплатны праезд пенсіянерам на перыяд правядзення выставы.

– А чаму інфармацыі з гэтай нагоды ў метрапалітэне зусім няма? Маглі хаця б аб’явы павесіць ля кас… Чаму не робяць абвесткі людзям у цягніках?

– Мы займаемся перавозкамі, а не іфармацыйным забеспячэннем. І робім тое, што нам сказалі.

На сайце Мінскага метрапалітэна не адразу, але з’явілася інфармацыя пра бясплатны праезд, а вось на сайце ДП “Мінсктранс” нічога няма.

“Што тычыцца інфармавання насельніцтва, то пытанні не да нас, бо гэта не наш працоўны план, – кажа памочніца генеральнага дырэктара ДП “Мінсктранс” Зоя Лабатая. – Мы сваю працу робім – прадастаўляем грамадзянам права бясплатнага праезду. Але калі казаць, напрыклад, пра агучванне ў транспарце ці іншае інфармаванне, то такога даручэння нам не было”.

Адным словам, гарадскія ўлады быццам перад святамі зрабілі добрую справу, а з іншага боку, невялікі асадачак у людзей усё роўна застаецца. Больш адкрытымі і шчырымі трэба быць, таварышы!

Аўтар: Алесь СІВЫ 
Каб мець магчымасць прачытаць цікавыя і актуальныя артыкулы, купляйце PDF-версію газеты!
Хуткая аплата праз смс-сервіс

Чытайце таксама

«Суд ускоренного режима». Главному фигуранту дела по ущербу «Беларуськалию» скостили срок до 8,5 года

По итогам апелляции суд смягчил на полгода приговор главному фигуранту дела по ущербу «Беларуськалию» Казимиру Соболевскому.

Умерла солистка группы Cranberries Долорес О’Риордан

В Лондоне умерла солистка ирландской группы Cranberries Долорес О'Риордан. Ей было 46 лет. Причину смерти певицы полиция не сообщает.