Анлайн-дадатак да газеты
"Народная Воля"

З такім пытаннем карэспандэнт “Народнай Волі” звярнуўся да людзей самых розных прафесій.
6:00 6 студзеня 2017
7
Памер шрыфта

Віктар ДРАЧЫЛОЎСКІ, галоўны аграном СПК “Нарачанскія зоры” (Вілейскі раён Мінскай вобласці):

– Калі шчыра, то працавалася не вельмі добра, і шмат у чым – з-за абставін, якія не ад гаспадаркі і людзей залежалі. Надвор’е выступіла, як кажуць, фронтам супраць нас. У маі–чэрвені 37 дзён не было дажджу, уяўляеце?! Сітуацыя з пасевамі была практычна крытычная, адпаведна і ўраджай мы недабралі на 30 працэнтаў ад запланаванага.

А ўвогуле год быў для маёй сям’і добры – дачку замуж аддаў. Два дні гулялі ў аграсядзібе пад Радашковічамі…

Наталля ПРАКАПЕНКА, намеснік начальніка Мінскага гарадскога ўпраўлення  Фонду сацыяльнай абароны:

– Што тычыцца працы, то тут нічога незвычайнага быццам бы не адбывалася. А калі пра асабістае… Я сама нарадзілася ў высакосны год і, калі верыць прыкметам, то ў 2016-м у мяне павінна было скласціся ўсё цудоўна. На жаль, прыкметы – гэта адно, а рэальнае жыццё – зусім іншае. Было шмат праблем у сям’і, і я вам хачу шчыра сказаць, што самае галоўнае – гэта здароўе. Усё астатняе, на мой погляд, дробязі жыцця, якія так ці інакш, але вырашаюцца.

Таццяна КАСЦЮКОВА, мантажніца радыёапаратуры ААТ “Цветатрон” (Брэст):

– Як працавалася, так і жылося. А заробкі ў гэтым годзе былі не больш за 230 рублёў у месяц. Вось і мяркуйце самі. Няхай кожны паспрабуе 30 дзён праіснаваць на гэтую суму, і тады ён знойдзе для сябе адказ на пытанне “Як вам жылося?».

Праўда, у нашай сям’і працуюць яшчэ муж і сын, ёсць дапамога з вёскі. Таму агульнымі намаганнямі неяк выжываем. Чакаю 2017 год, калі ўжо буду 500 долараў атрымліваць. Лукашэнка як быццам абяцаў…

Ігар ЛАГОЙКА, намеснік генеральнага дырэктара ААТ “Крыніца”:

– Добра спрацавалі, і ўпершыню “Крыніца” выйшла на такія вынікі. Другі год запар маем чысты прыбытак, заробак у адрозненне ад некаторых іншых прадпрыемстваў цэлы год заставаўся стабільны. Да слова, у сярэднім заробак у нас складае каля 830 рублёў у месяц. Летам, як і было запланавана, працавалі ў тры змены. Аб’ёмы на ўзроўні, экспарт таксама і нават крыху павялічыўся… Таму год можна занесці ў актыў.

Іншая справа, што агульная сітуацыя з эканомікай крыху прыгнятае. Хаця ўсе мы ў чаканні лепшага. І, як кажуць, толькі б не было вайны…

Юрась МЕЛЯШКЕВІЧ, намеснік старшыні руху “За свабоду”:

– Як жартуе адзін мой таварыш: “2016-ы – апошні год, калі беларусы жылі кепска. Далей будзе вельмі кепска”.

А калі сур’ёзна, то гэты год быў для мяне перыядам даволі актыўнага палітычнага жыцця. Прайшла парламенцкая кампанія, сам браў у ёй актыўны ўдзел. І хаця не патрапіў у парламент, радуе, што там з’явіліся прадстаўнікі дэмакратычнай грамадскасці. Адбылося вяртанне апазіцыйных палітыкаў у так званы парламент.

Аляксандр ВАЙТОВІЧ, загадчык лабараторыі Інстытута фізікі Нацыянальнай акадэміі навук Беларусі:

– Зараз у навуцы працаваць вельмі складана. І практычна нічога ў краіне не прадпрымаецца, каб нешта змянілася ў лепшы бок. Вельмі слабыя фінансаванне, матэрыяльная база… Таму моладзь не вельмі ахвотна ідзе ў навуку, а ў фізіку – тым больш. А калі нехта і прыходзіць, то набіраецца вопыту і адразу думае: дзе б знайсці іншае, высокааплатнае, месца?..

Але ў навуцы хаця і цяжка працаваць, але асабіста я атрымліваю ад работы задавальненне. Як быццам пераляцеў у маладыя гады.

Васіль АШУРОК, галоўны аграном ААТ “Чарлена” (Мастоўскі раён Гродзенскай вобласці):

– І жылося, і працавалася нармальна. У раслінаводстве першае месца ў раёне заваявалі, тое самае – па вытворчасці азімага рапсу…

У агранаміі ў нас цудоўная каманда сабралася, і што галоўнае – практычна ўсе маладыя. Сярэдні ўзрост – да 30 гадоў. Мне, напрыклад, дваццаць дзевяць, мая жонка, якая, да слова, таксама працуе ў гаспадарцы аграномам, на чатыры гады маладзейшая. Так што ў нас, лічыце, сямейны падрад!

Франц ЖЫЛКА, бізнесмен, дырэктар кампаніі “Фра-Міл”:

– Год запомніўся тым, што наша стаматалагічная клініка пераехала ў сваё новае памяшканне. Пашырыўся спектр паслуг. Акрамя таго, мы шыем боты для верхавой язды і роты ганаровай варты, і было некалькі добрых заказаў. Напрыклад, калі ў Мінск у гэтым годзе прылятаў прэзідэнт Туркменістана, ён убачыў нашу прадукцыю на нагах матацыклістаў з прэзідэнцкага ганаровага эскорту. Спадабалася. У выніку адмыслова рабілі 50 пар ботаў для роты ганаровай варты Туркменістана і групы эскорту.

А ўвогуле, вельмі цяжкі быў год, крызіс ударыў па бізнесе. Каб заставацца на плыву, давялося прыкладна на 30 працэнтаў зніжаць кошты на прадукцыю і паслугі нават у доларах. Калі тры-чатыры гады таму тыя ж боты каштавалі 230–250 долараў, то зараз аддаем па 180–200.

Апытанне праводзіў Алесь СІВЫ. 

Каб мець магчымасць прачытаць цікавыя і актуальныя артыкулы, купляйце PDF-версію газеты!
Хуткая аплата праз смс-сервіс

Чытайце таксама

Ёсць выява забойцы Паўла Шарамета. Але ўкраінскія ўлады яе хаваюць

Украінская паліцыя мае відэа, на якім бачны два верагодныя забойцы журналіста Паўла Шарамета. Пры гэтым выява твару жанчыны, якая падклала выбухоўку пад аўтамабіль, вельмі дакладная. Але ўкраінская па

На замглавреда «Эха Москвы» Татьяну Фельгенгауэр напали с ножом

Неизвестный проник в редакцию радиостанции "Эхо Москвы" и ранил ножом заместителя главного редактора радиостанции Татьяну Фельгенгауэр. Эту информацию агентству Интерфакс подтвердил главный редактор "

Міністр эканомікі: Ёсць сферы, дзе заробку ў 1000 рублёў давядзецца пачакаць

Нягледзячы на планы ўладаў да канца 2017 года падняць сярэдні заробак у Беларусі да 1000 рублёў, яго ўбачаць не ўсе і не адразу. Гэты факт у эфіры тэлеканала АНТ канстатаваў міністр эканомікі Уладзімі