«Так маляваць – Божы дар!» – у сацыяльных сетках людзі высока ацэньваюць малюнкі палітвязня, якія ён дасылае на волю.

Нагадаем, што палітык Павел Севярынец быў затрыманы 7 чэрвеня 2020 года – яшчэ да прэзідэнцкіх выбараў. У маі мінулага года Паўлу прысудзілі 7 гадоў зняволення ў калоніі ўзмоцненага рэжыму за «арганізацыю масавых беспарадкаў».

З-за кратаў палітык дасылае сваёй жонцы Вользе і трохгадоваму сыну Францішку малюнкі, якія, трэба сказаць, уражваюць сваім прафесіяналізмам.

Мастацкія здольнасці Паўла Севярынца

«Думаю, пара пахваліцца, што ад Паўла за апошнія месяцы сабралася яшчэ дзесяць новых малюнкаў храмаў, паведаміла Вольга Севярынец. – Будзем рабіць новыя паштоўкі.

…А ўвогуле, дома ў нас ужо цэлая галерэя. Францішак па тры разы на дзень просіць мяне схадзіць праверыць, ці прыйшоў ліст ад таты. Лісты прыходзяць кепска, але Францішак упарта чакае і спрабуе ўгадаць, што тата намалюе яму ў наступным лісце. У Магілёўскай турме стараліся акуратна забіраць вялікі канверт, каб не змяць, бо Павел іх навучыў, што там малюнак для сына».

– Паша вучыўся ў Віцебску ў сярэдняй школе №25 у класе з мастацкім ухілам, – распавяла «Народнай Волі» Таццяна Севярынец, маці палітвязня. – Дачкі пайшлі ў музычныя школы, а вось сын з дзяцінства добра маляваў, і самае галоўнае, што яму падабаўся гэты занятак.

Дарэчы, сярод нашых родных шмат таленавітых людзей. Мая мама таксама добра малявала, а, напрыклад, стрыечны брат Міхаіл Качаноўскі спяваў у Оперным тэатры. Другі брат, Аляксандр Будзько, доўгі час працаваў у філармоніі. Дачушак і сына Бог таксама талентам не абышоў.

Пасля школы Павел Севярынец свае мастацкія здольнасці асабліва не развіваў. Хаця, калі вучыўся ва ўніверсітэце, працягваў маляваць, але больш для сябе.

– Закінуў гэтую справу, калі заняўся палітыкай, – кажа Таццяна Севярынец. – Элементарна не хапала часу на тое, каб маляваць. А зараз, калі вольнага часу ў камеры хапае, узгадаў сваё старое захапленне. І мастацкія здольнасці яшчэ больш праявіліся.

Увогуле, мне заўсёды падабаліся партрэты Пашы і яго пейзажныя замалёўкі. Мой партрэт і партрэт бацькі да гэтага часу вісяць у нас дома. А зараз Вользе і сыну Францішку шмат малюнкаў дасылае. А мы яму перадаём алоўкі.

Вольга Севярынец дадае, што малюнкі храмаў, якія дасылае Павел, можна набыць праз інтэрнэт-краму ў выглядзе паштовак.

– За ўвесь час, пакуль муж знаходзіцца за кратамі, ён даслаў нам больш за 70 малюнкаў, – кажа Вольга. – Усё гэта разам з тэкстамі Паша дасылае сыну. А паколькі Францішак вельмі цікавіцца машынкамі, то муж малюе не толькі храмы, але і аўтамабілі, самалёты і іншую тэхніку. Здаецца, нядрэнна атрымліваецца.

Публікацыя з № 6 газеты “Народная Воля. Падпісацца на газету.

Поделиться ссылкой:

Падтрымаць «Народную Волю»