Дзе ўзяць бясплатныя саджанцы дрэў і кустоў и не парушыць заканадаўства?
Дзе ўзяць бясплатныя саджанцы дрэў і кустоў и не парушыць заканадаўства?

Хочаце азеляніць свой участак, вёску, школу? Грамадская арганізацыя “Ахова птушак Бацькаўшчыны” (АПБ) расказвае, як атрымаць саджанцы з лесу.

Сакавік і красавік найлепшыя месяцы, калі можна без праблемы перасадзіць дрэвы і кусты. Каліна, рабіна, крушына ўпрыгожаць участак і пачастуюць насякомых нектарам, калі квітнеюць увесну, а ўзімку падораць свае ягады і насенне птушкам.

Проста так выкопваць у лесе маладыя дрэўцы і кусты нельга паводле артыкула 16.17 Адміністратыўнага кодэкса – памеры штрафаў вагаюцца ад 5 да 300 базавых велічынь. Але можна атрымаць для асабістых патрэб бясплатныя саджанцы, звярнуўшыся ў найбліжэйшы лясгас ці лясніцтва.

– Супрацоўнік раскажа пра тое, дзе і якія пароды дрэў і кустоў можна выкапаць, і дамовіцца з вамі на канкрэтны дзень, калі вы зможаце гэта зрабіць, – паведаміў кансультант Упраўлення лясной гаспадаркі Мінлясгаса Сяргей Булах. – Ніякіх заяў для гэтага пісаць не трэба, абмежаванняў па колькасці дрэваў ці кустоў няма.

Звычайна выкопваць саджанцы дазваляюць на ўчастках, дзе плануецца высечка або там, дзе пад буйнымі дрэвамі расце шмат маладняку. Такім дрэўцам цяжка выжыць праз унутраную канкурэнцыю: раслінам не хапае святла і харчовых рэчываў. Вы можаце працягнуць ім жыццё, перасадзіўшы іх на свой падворак.

Аляксандр Вінчэўскі, дырэктар АПБ:

У Валмянскім лясніцтве Чэрвеньскага лясгаса мне ўдакладнілі, што без праблем любыя саджанцы дрэў і кустоў можна забіраць з-пад ліній ЛЭП, якія праходзяць праз лясы. Звычайна пад імі знішчаюць амаль усе дрэвы, але калі вы нешта знойдзеце – можаце забраць сябе бясплатна. На ўсялякі выпадак ўдакладніце гэтую інфармацыю ў суседнім лясніцтве.

Стварыце куток дзікай прыроды побач з сабой, і ён падорыць вам цікавыя назіранні і добры настрой!

Поделиться ссылкой: