Крытэрыі якасці жыллёва-камунальных паслуг зацверджаны ў Беларусі

240
Подпіс
Фота з архіва БЕЛТА

Крытэрыі якасці жыллёва-камунальных паслуг вызначаны ў Беларусі. Адпаведная пастанова Савета Міністраў ад 16 лістапада 2020 года нумар 654 афіцыйна апублікавана сёння на Нацыянальным прававым інтэрнэт-партале, паведамляе БЕЛТА.

Для тэхнічнага і санітарнага абслугоўвання крытэрыем якасці з’яўляецца бесперабойнае функцыянаванне інжынерных сістэм, спраўнасць канструктыўных элементаў будынкаў, своечасовае ўстараненне няспраўнасцей, а таксама адсутнасць прэтэнзій ад спажыўцоў. Што датычыцца капітальнага рамонту, то крытэрыямі яго якасці названы захаванне этапаў планавання і арганізацыі капрамонту, тэрмінаў і графікаў работ, адсутнасць прэтэнзій спажыўцоў.

Для тэхнічнага абслугоўвання ліфтаў крытэрыямі з’яўляюцца бесперабойная і бяспечная работа, вызваленне пасажыраў з кабіны ліфта на працягу 15 мінут з моманту паступлення выкліку пры ўзнікненні аварыйнай сітуацыі.

Цвёрдыя камунальныя адходы, згодна з зацверджанымі крытэрыямі, павінны вывозіцца ў адпаведнасці з перыядычнасцю, устаноўленай схемай. Другасныя матэрыяльныя рэсурсы павінны перапрацоўвацца па існуючых тэхналогіях.

Крытэрый якаснага абслугоўвання запорна-перагаворных устройстваў і сістэм відэанагляду – іх бесперабойная работа, а для відэанагляду – яшчэ і магчымасць захоўвання даных у сістэме не менш за 72 гадзіны.

Для водазабеспячэння вызначаны нормы забеспячэння вадой не менш за 140 л у суткі на чалавека, у тым ліку 70 л у суткі гарачай вады. Тэмпература гарачай вады павінна быць не меншай за плюс 50 градусаў, але не большай за плюс 75. Акрамя таго, якасць пітной вады павінна адпавядаць санітарным правілам і нормам.

Што датычыцца водаадвядзення, то крытэрый яго якасці – кругласутачны і пастаянны прыём сцёкавых вод у цэнтралізаваную сістэму каналізацыі. Перапынкі могуць быць не большымі за 24 гадзіны пры ліквідацыі аварый.

Тэмпература паветра ў жылых памяшканнях павінна быць не меншай за плюс 18 градусаў, але не большай за плюс 24. Для газазабеспячэння крытэрыем вызначана бесперабойная падача газу, а для электразабеспячэння – бесперабойная падача напружання 230/240 В у межах нормы адхілення плюс/мінус 10 працэнтаў ад напружання 230/400 В.


Няма запісаў для адлюстравання