На здымку: Яўген Хадакоў

Дзве ўчастковыя камісіі (№№ 9 і 10) Чыгуначнага раёна Гомеля пазбавілі акрэдытацыі назіральніка Яўгена Хадакова, давераную асобу кандыдата ў прэзідэнты Андрэя Дзмітрыева.

У рашэнні камісіі №9, якую ачольвае Святлана Брундукова, гаворыцца, што Хадакоў парушаў артыкул 13 Выбарчага кодэкса. Менавіта: «У той час, калі выбаршчыкі стаялі каля дзвярэй і чакалі працэса галасавання, назіральнік Хадакоў Я.І. дыктаваў свае ўмовы, знаходзіўся каля сталоў выдачы бюлетэняў, рабіў галасавы запіс на мабільны тэлефон, даваў указанні старшыні і сакратару ўчастковай выбарчай камісіі». І далей: «Заўвагу старшыні камісіі Брундуковай С.У. пра недапушчэнне такіх дзеянняў назіральнік Хадакоў Я.І. праігнараваў».

Дваццацігадовы назіральнік і давераная асоба кандыдата ў прэзідэнты распавёў, што 5 жніўня яго не дапусцілі на ўчастак з прычыны складанай эпідэміялагічнай сітуацыі і прысутнасці ўжо трох назіральнікаў. На гэта Хадакоў напісаў скаргу на парушэнне свайго права на назіранне, а таксама вусна звярнуўся ў міліцыю. У адказ сакратар Марына Штрапава падала службовую запіску старшыні камісіі, а дапушчаныя на ўчастак трое назіральнікаў падмацавалі яе сваімі актамі парушэння – і Хадакова пазбавілі акрэдытацыі.

Падобным чынам адкараскаліся ад прынцыповага Хадакова і на выбарчым участку №10.

«Самае ў дзіўнае ў згаданай сітуацыі тое, што, напрыклад, выбарчая камісія №12 у Цэнтральным раёне мяне дапускае на ўчастак сачыць за датэрміновым галасаваннем, нават калі там ёсць ужо трое назіральнікаў. Разумеюць, што я яшчэ і давераная асоба», – кажа малады назіральнік.

Поделиться: