Вераніка Гарбачова (злева) і Галіна Рэпіна. Фота з «УКантакце»

Расказваем, як выбарчыя камісіі ўзгадняюць «сваіх» людзей, парушаючы занадаўства.

Мінчанка Любоў Кавальчук спрабавала патрапіць у выбарчую камісію ўчастка №42 Першамайскага раёна сталіцы. Сабрала неабходныя 10 подпісаў, але яе не ўключылі: на паседжанні два чалавекі прагаласавалі «за», восем «супраць» і адзін устрымаўся. Прычыну, натуральна, не тлумачылі, распавядае Наша Ніва.

Любоў вырашыла пайсці ў суд. Скаргу там не задаволілі. Але пры азнаямленні з матэрыяламі справы жанчына заўважыла цікавую рэч:

двух чалавек, якіх уключылі ў камісію, вылучалі адны і тыя ж грамадзяне. Супадаюць усе 10 подпісаў у заяўках, нават іх паслядоўнасць.

«Я не збірала подпісы». Дзвюх настаўніц уключылі ў выбарчую камісію ў абыход закона

Гэта грубае парушэнне заканадаўства. Згодна з артыкулам 35 Выбарчага кодэкса, грамадзяне могуць вылучаць у камісю толькі па адным прадстаўніку.

Тыя дзве заяўкі з аднолькавымі подпісамі падалі педагогі 61-й школы Мінска — настаўніца пачатковых класаў Вераніка Гарбачова і настаўніца геаграфіі Галіна Рэпіна. Большасць тых, хто падпісаўся ў іх падтрымку, або працуюць у 61-й школе, або раней працавалі, або знаходзяцца ў сваяцкіх стасунках.

«Наша Ніва» звязалася з настаўніцамі. Галіна Рэпіна нічога каментаваць не стала. Вераніка Гарбачова, пачуўшы пра аднолькавыя подпісы, разгубілася.

«Я не магу адказаць на гэтае пытанне, я не ведаю», — адказала яна.

«НН»: Можа, вы разам з Рэпінай іх збіралі?

«Не, я не збірала подпісы… Я не ведаю, чаму такая колькасць аднолькавая. Можа, гэта збег абставін, супадзенне», — спрабавала патлумачыць Гарбачова.

Мы патэлефанавалі таксама старшыні Першамайскага раёна Мінска Дзмітрыю Шашку, які зацвярджаў кандыдатуры. Няўжо ён не заўважыў супадзення ў заяўках?

«Я не збірала подпісы». Дзвюх настаўніц уключылі ў выбарчую камісію ў абыход закона
Дзмітрый Шашок. Фота minsknews.by

Дзмітрый Шашок: Першы раз чую, мне трэба даведацца. Прабачце, не магу нічога пракаментаваць.

«НН»: А вы подпісы не правяралі, калі іх вам здавалі?

Дзмітрый Шашок: Правяралі… Шчыра, не ведаю. Не магу ні адмаўляць, ні пацвярджаць.

«НН»: Дык а рабіць штосьці будзеце з гэтым?

Дзмітрый Шашок: Правяраць інфармацыю вашу зараз. Прабачце, усё.

Поделиться ссылкой: