29 чэрвеня прайшло паседжанне Савецкай раённай камісіі горада Гомеля па выбарах прэзыдэнта.

На ім прысутнічаў доўгатэрміновы назіральнік ад кампаніі «Праваабаронцы за свабодныя выбары» Леанід Судаленка. Камісія знайшла высокі адсотак несапраўдных подпісаў за Віктара Бабарыку і Валерыя Цапкалу. У выніку ўсе здадзеныя подпісы — а гэта 4870 за Бабарыку і 1956 за Цапкалу прызналі несапраўднымі.

Леанід Судаленка расказаў Свабодзе, што самы вялікі працэнт несапраўдных подпісаў па выніку асноўнай і дадатковай праверкі выяўлены ў Віктара Бабарыкі — 23,28%. Спачатку тэрытарыяльная камісія правярала 15% подпісаў. Калі знаходзіла там неадпаведнасці, на праверку бралі іншыя подпісы.

У выніку камісія прыняла рашэнне не залічваць Віктару Бабарыку ўсе здадзеныя 4870 подпісаў. У Валерыя Цапкалы па выніку дзвюх праверак несапраўднымі прызналі 16,53%. За гэта камісія не залічыла ўсе 1956 подпісаў, якія здалі сябры яго ініцыятыўнай групы.

«Чыстымі» аказаліся ўсе 45 подпісаў, якія здалі ў камісію сябры ініцыятыўнай групы Ганны Канапацкай. Былі прызнаныя несапраўднымі некаторыя подпісы за Аляксандра Лукашэнку, Сяргея Чэрачня, але адсотак несапраўдных подпісаў за іх — каля 4-5% — дазволіў камісіі не праводзіць дадатковай праверкі, і здадзеныя подпісы за іх прызналі сапраўднымі. Толькі ў дачыненьні подпісаў за Віктара Бабарыку і Валера Цапкалу праводзіліся дадатковыя праверкі», — зазначыў Леанід Судаленка.

Савецкі раён Гомеля – адзін з самых буйных, тут пражывае 180 тысяч чалавек.

На праверку ў Савецкім раёне Гомеля здалі подпісы за Аляксандра Лукашэнку — 29 496, Віктара Бабарыку — 4 870 подпісаў, Валера Цапкалу — 1 956 подпісаў, Святлану Ціханоўскую — 1 261 подпіс, Сяргея Чэрачня — 1 203 подпісы, Андрэя Дзмітрыева — 879 подпісаў, Ганну Канапацкую — 45 подпісаў.

Паседжанні для прызнаньня подпісаў адбываюцца і ў іншых тэрытарыяльных камісіях.