Генадзь Фядыніч на судзе

Крымінальна-выканаўчая інспекцыя Цэнтральнага РУУС Мінску 2 мая азнаёміла лідэра прафсаюза РЭП Генадзя Фядыніча з унесенымі зменамі, піша ПЦ «Вясна» са спасылкай на praca-by.info.

Раней з просьбамі змяніць устаноўлены рэжым адбывання «хатняй хіміі» неаднаразова звярталіся і прафсаюз РЭП, і сам Фядыніч.

Інспекцыя ўстанавіла новую адлегласць для выхаду ад жылля лідэра РЭП — плошча пашырана ад кватэры да паштовых скрыняў (у вольны ад працы час).

«Мне ўстаноўлены новы час наведвання арганiзацый аховы здароўя, устаноў сувязі, гандлю, бытавога абслугоўвання, фінансавых і іншых арганізацый у буднія дні — з 18.00 да 20.00. Папярэдняе прадпісанне выканаўчай інспекцыі наведваць гэтыя ўстановы з 12 да 14 парушала Працоўны кодэкс, паколькі з 13 да 14 у мяне абедзенны перапынак. Я не мог застацца на працы пасля 18 гадзін і прымаць людзей. Цяпер такая магчымасць з’явілася», — падкрэсліў Генадзь Фядыніч.

Накладзеная забарона на выхад з дому з 21 да 6 гадзін раніцы (да гэтага Фядынічу прадпісвалася знаходзіцца ў кватэры з 19 гадзін да 6 гадзін раніцы).

— Таксама засталася ў сіле забарона выхаду з кватэры ў суботу, нядзелю, у выхадныя і святочныя дні. Мой шлях у гэтыя дні выразна ўстаноўлены: кватэра і паштовыя скрыні, балазе, што я жыву на 7 паверсе, а паштовыя скрыні знаходзяцца на першым, — іранізуе Генадзь Фядыніч. — Застаюцца адкрытымі пытанні пра наведванне царквы і магчымасці два разы на месяц у дзённы час займацца гаспадарчымі працамі — дапамагаць па гаспадарцы цешчы, якой ужо 83 гады. Пакуль на ўсе вусныя звароты я атрымліваў адмоўны адказ. Ну што ж, будзем зноў звяртацца пісьмова — няхай даюць пісьмовы аргументаваны адказ. Невінаваты чалавек заўсёды паводзіць сябе адкрыта, не хаваючыся, з прадстаўнікамі якіх бы органаў я ні меў зносіны.

— Некаторае змякчэнне рэжыму «хатняй хіміі» апынулася некалькі нечаканым. Чым выкліканыя змены, якія адбыліся?

— Я далёкі ад думкі, што супрацоўнікі выканаўчай інспекцыі не валодаюць нормамі працоўнага заканадаўства. Па ўсёй верагоднасці, ёсць нейкая «невядомая сіла», якая вызначае лёс кожнага асуджанага — ці то тэлефон, ці то іншыя прадметы ўжытку. Я ўпэўнены, што час усё расставіць на свае месцы.

Нагадаем, 9 лістапада Мінскі гарсуд пакінуў у сіле прысуд суда Савецкага раёна: лідэры прафсаюза РЭП Генадзь Фядыніч і Ігар Комлік прызнаныя вінаватымі па ч. 2 арт. 243 Крымінальнага кодэкса Рэспублікі Беларусь (ухіленне ад выплаты падаткаў у буйным памеры). Абодва прысуджаныя да 4 гадоў абмежавання волі без накіравання ва ўстановы адкрытага тыпу. Мінскі гарадскі суд пакінуў рашэнне раённага ў сіле.

Ігара Комлік паставілі на ўлік у крымінальна-выканаўчай інспекцыі Фрунзенскага РУУС Мінска ў снежні 2018 года, Генадзя Фядыніча азнаёмілі з рэжымам «хатняй хіміі» 4 студзеня 2019 года.