Фота: ria.ru

Старшыня Цэнтральнай выбарчай камісіі Лідзія Ярмошына 10 студзеня заявіла, што прэзыдэнцкія выбары ў Беларусі мусяць адбыцца не пазьней за 30 жніўня 2020 году, а выбары дэпутатаў Палаты прадстаўнікоў — не пазьней за 6 верасьня 2020 году. Розьніца — усяго адзін тыдзень, паведамляе Радыё Свабода.

«У беларускім заканадаўстве існуе толькі тэрмін „не пазьней за“. Гэта значыць, праводзіць выбары пазьней за гэтыя даты нельга. А раней можна. А вось наколькі раней, у заканадаўстве не прапісана», — тлумачыць старшыня ЦВК.

Сёньня Аляксандар Лукашэнка на нарадзе аб сацыяльна-эканамічным разьвіцьці краіны ў 2019 годзе назваў сёлетні год «перадвыбарным».

Калі Лукашэнка называе 2019 год перадвыбарным, ці магчыма, што абедзьве выбарчыя кампаніі пройдуць у 2020 годзе? На гэтае пытаньне Лідзія Ярмошына адказала:

«Можа, так, а мо і не. Дапускаю, што адны выбары могуць адбыцца ў канцы гэтага году, а другія ў 2020-м. Я па-ранейшаму лічу, што дзьве выбарчыя кампаніі трэба разьвесьці па розных гадах. Але паколькі Цэнтральная выбарчая камісія не прызначае выбары, то вырашаць усё будуць кіраўнік дзяржавы і парлямэнт. Думаю, што ўсё стане вядома ў красавіку, калі прэзыдэнт выступіць з традыцыйным пасланьнем да народу і парлямэнту».

Паводле Ярмошынай, супрацоўнікі ЦВК цяпер рыхтуюць пакеты дакумэнтаў на абедзьве выбарчыя кампаніі, незалежна ад таго, якая стане першай.

Папярэднія прэзыдэнцкія выбары ў Беларусі прайшлі 11 кастрычніка 2015 году, апошнія парлямэнцкія — 11 верасьня 2016 году. Прэзыдэнт выбіраецца на 5 гадоў, дэпутаты — на 4.