Міхаіл Жамчужны збіты ў калоніі, яго жыццё пад пагрозай

149

Пра пагрозы жыццю и здароўю праваабаронца Міхаіл Жамчужны заяўляў і раней, але зараз праваабрончаму цэнтру «Вясна» сталі вядомы падрабязнасці аб збіцці Міхаіла Жамчужнага ў калоніі ў Горках.

Днём 24 студзеня Міхаіл Жамчужны быў пакінуты без аховы і нагляду ў калідоры санчасткі, дзе быў збіты іншым асуджаным – у чорных акулярах, вязаных чорных пальчатках і шапцы. Нападнік захапіў Жамчужнага левай рукой за горла і нанёс некалькі ўдараў па галаве. Пры гэтым нападнік прыгразіў, што калі сустрэне Жамчужнага ў калоніі – “распусціць на ніткі”.

Па дадзеным інцыдэнце палітвязнем пададзена скарга ў пракуратуру Магілёўскай вобласці.

Таксама стала вядома, што падчас знаходжання ў ПКТ, куды палітвязень Міхаіл Жамчужны быў змешчаны 5 студзеня тэрмінам на адзін месяц за “невыкананне законнага патрабавання прадстаўніка адміністрацыі следаваць у атрад”, у адносінах да яго было вынесена яшчэ адно спагнанне – трое сутак штрафнога ізалятару. Чарговае пакаранне было вынесена палітвязню 19 студзеня за нібыта выяўлены ў ягонай камеры пыл і з 20 па 23 студзеня ён ужо адбываў яго. Такім чынам, гэта ўжо 18-е спагнанне з часу змяшчэння Міхаіла Жамчужнага ў калонію №9 г. Горкі і з ПКТ ён выйдзе на 3 сутак пазней вызначанага тэрміну: не 5, а 8 лютага.

Па меркаванні палітвязня, адміністрацыя калоніі вырашыла змяніць тактыку, і зараз спагнанні будуць выносіцца не за адмовы следаваць у атрад, сфармаваны са зняволеных з “нізкім статусам”, як гэта адбывалася на працягу апошняга паўгоддзя, а за “парушэнне правілаў асабістай гігіены” – будуць прад’яўляцца прэтэнзіі да формы адзення, прыборкі камеры і таму падобнае.

Варта адзначыць, што Міхаіл Жамчужны актыўна абскарджвае вынесеныя яму спагнанні, тлумачачы сапраўдныя прычыны адмоваў следаваць у атрад. Так, зараз ён накіраваў ва Упраўленне дэпартаменту выканання пакаранняў па Магілёўскай вобласті скаргу на вынесеныя ў верасні і кастрычніку 2017 года спагнанні: 4 верасня – адзін месяц змяшчэння ў ПКТ, 10 сутак змяшчэння ў ШІЗА ад 5 кастрычніка, 10 сутак ШІЗА ад 16 кастрычніка і 5 сутак ШІЗА ад 26 кастрычніка. Пададзена таксама касацыйная скарга на рашэнне суда Горацкага раёна, які 23 студзеня адмовіў у задавальненні скаргі на тры спагнанні, вынесеныя Міхаілу Жамчужнаму ў жніўні 2017 года — 7, 10 і 7 сутак ШІЗА.  У суд Горацкага раёна пададзена таксама скарга на вынесенае апошняе спагнанне – 3 сутак ШІЗА.

Нагадаем, праблемы ў Міхаіла Жамчужнага пачаліся пасля яго пераводу ў Горацкую калонію, дзе з патурання адміністрацыі для яго былі створаныя невыносныя ў сілу сваёй жорсткасці і зневажальнага характару ўмовы для адбыцця пакарання, арганізавана кампанія яго траўлі, звязаная з ўсталяваннем у асяроддзі зняволеных нефармальных адносін.