Аляксандр Вянгерскі: “Зараз працую за мяжой, каб аплаціць штраф БАТЭ”

34

Нагадаем, што падчас матча Лігі Еўропы паміж БАТЭ і лонданскім “Арсеналам” на поле “Барысаў-Арэны” выбег хлопец з бел-чырвона-белым сцягам. Ахова стадыёна затрымала яго і вывела з поля.

Пазней суд Барысаўскага раёна асудзіў жыхара Вілейкі Аляксандра Вянгерскага на 10 сутак адміністрацыйнага арышту за дробнае хуліганства і “непадпарадкаванне законнаму патрабаванню службовай асобы”, а БАТЭ атрымаў ад УЕФА за ўчынак балельшчыка штраф у памеры 5 тысяч еўра.

У выніку БАТЭ вырашыў падаць на Вянгерскага ў суд “рэгрэсіўны іск”, каб спагнаць гэтыя грошы. Іх клуб збіраецца аддаць “на дабрачыннасць”. Вядома, што БАТЭ ўжо перадаў усе неабходныя дакументы па гэтай справе ў суд Вілейскага раёна.

Карэспандэнт “Народнай Волі” звярнуўся да Аляксандра Вянгерскага за каментарыем, і ён паведаміў, што на судзе прысутнічаць не будзе.

– Я зараз знаходжуся за мяжой, працую, – распавядае Аляксандр. – Спадзяюся, што суд аб’ектыўна разбярэцца ў абставінах справы, але для мяне не будзе трагедыяй, калі працэс прайграю. Праўда, не чакаючы судовага рашэння, я з’ехаў у адну еўрапейскую краіну, дзе ўжо пэўны час працую. З’ехаў менавіта дзеля таго, каб зарабіць грошы на аплату штрафу. Хаця збіраюся іх перадаць наўпрост у дзіцячы дом.

– Значыцца, на суд вы не збіраецеся?

– Я не вярнуся ў Беларусь, пакуль не зараблю 5 тысяч еўра. Калі суд перанясуць, то будзе добра, але за межамі краіны буду знаходзіцца прыкладны 4–5 месяцаў. Затым перадам грошы ў дзіцячы дом і толькі пасля гэтага прыйду ў суд. Калі ж судовае рашэнне не на маю карысць будзе прынята завочна, без майго ўдзелу, то альбо буду абскарджваць яго, альбо вымушаны буду заплаціць яшчэ 5 тысяч еўра.

– Можа, у такім выпадку па выніку судовага рашэння лепш аддаць грошы клубу, а ўжо затым сумесна з БАТЭ перадаць іх у дзіцячы дом? Будзе такі своеасаблівы акт прымірэння…

– Я прынцыпова хачу паказаць, што гатовы адказваць за свае дзеянні, але на дабрачыннасць грошы перадам сам. Калі ж барысаўчане яшчэ 5000 еўра адсудзяць, то і гэтую суму, думаю, грамадой знойдзем. Няхай ім будзе лягчэй на душы і сэрцы…

Поделиться ссылкой: