Вадзім Іосуб: “Ураўноўванне заробкаў” можа прывесці да ўцёкаў банкіраў з Беларусі

14

Такі пункт гледжання ў размове з Еўрарадыё выказаў старэйшы аналітык “Альпары” ў Мінску Вадзім Іосуб.

На думку аналітыка, заробкі і бонусы мэнаджараў камерцыйных банкаў не бяруцца “са столі”. “Як звычайна, бонусы плацяцца з прыбытку, то бок, гэта ў любым выпадку заробленыя грошы. А па-другое, яны, як звычайна, прывязаныя да пэўных каэфіцыентаў эфектыўнасці”, — лічыць Іосуб.

Увасабленне ў жыццё патрабаванняў рэгуляваць прыбыткі банкаўскіх топаў можа прывесці да ўцёкаў банкіраў з краіны.

“Беларусь — не адзіная краіна ў свеце. Калі стварыць тут нецікавыя, неканкурэнтныя ўмовы працы для банкаўскіх менаджэраў, у іх з’явіцца спакуса з’ехаць у якую-небудзь краіну па суседстве, — працягвае Вадзім Іосуб. — Адток ў іншыя галіны наўрад ці можа быць масавым. Усё ж такі кіраўнік банка — гэта глыбокі спецыяліст ў досыць вузкай сферы. А хутчэй за ўсё, гаворка можа ісці нават не пра звальненне, а пра перавод часткі даходаў у цень. У рэшце рэшт, менавіта банкам чыста тэхнічна прасцей за ўсё рэалізоўваць розныя схемы”.

У выніку бюджэт не далічыцца падаткаў, якія банкаўскія топ-менаджары плацяць са сваіх даходаў.

“Спецыяльна думаў над пытаннем: ці можна знайсці хоць нейкі плюс у гэтых закліках абмежаваць “тлустых катоў” у даходах. Шчыра кажучы, у мне гэта не атрымалася. Гэта дзіўнае няправільнае і нават дурное рашэнне з усіх пунктаў гледжання”, — дадае эксперт.

Поделиться ссылкой: