Як паведамілі БелаПАН у абласным камітэце, масавае мерапрыемства дазволенае гарвыканкамам і пройдзе на пляцоўцы ля ДК Беларускага таварыства глухіх «Віпра» на вуліцы Юбілейнай.

У абкаме заўважылі, што патрабаванні і лозунгі на мітынгу — сацыяльныя: «Не — інфляцыі! Так — індэксацыі!», «Чалавеку працы — павага і дастойная зарплата!», «Не — росту тарыфаў на камунальныя паслугі!», «Святло і цяпло у кожны дом па даступных цэнах!» і іншыя.

На мітынгу плануецца выступіць супраць згортвання сацыяльных праграм у Беларусі, платнай медыцыны, росту тарыфаў ЖКГ, прымусовай кантрактнай сістэмы найму.

На масавым мерапрыемстве будзе прыняты зварот да кіраўніцтва Гомеля і краіны. «Толькі сумеснымі дзеяннямі мы прымусім кіраўніцтва рэспублікі павярнуцца тварам да народа», — адзначаюць арганізатары мітынгу.

У Гомелі больш за дзесяць гадоў гарвыканкам не даваў дазволаў на правядзенне мітынгаў і пікетаў, ініцыяваных дэмакратычнымі арганізацыямі і апазіцыйнымі партыямі. Толькі вясной 2017 года гарвыканкам дазволіў левым правесці 1 мая мітынг, што адбыўся на пляцоўцы ля ДК «Віпра». Нягледзячы на тое што масавае мерапрыемства было санкцыянаваным, пасля яго завяршэння некаторыя ўдзельнікі былі затрыманыя міліцыяй.