Гендырэктара УП “Белкаапзнешгандаль Белкаапсаюза” судзяць за атрыманне хабару на 7,5 тыс. долараў

15

Генеральнага дырэктара судзяць за сістэматычнае атрыманне хабару на агульную суму прыблізна 7,5 тысячы долараў. Абвінавачаны Уладзімір Забродскі сваёй віны не прызнае, паведамляе БелаПАН.

Як вынікае з абвінавачання, Забродскі атрымліваў хабар за тое, што забяспечыў пагашэнне запазычанасці перад кампаніяй “Свет піва”, з якой у “Белкаапзнешгандлю” былі заключаныя дагаворы пастаўкі.

Пасаду кіраўніка Забродскі заняў у 2014 годзе і па-ранейшаму лічыцца генеральным дырэктарам прадпрыемства — яго звесткі размешчаныя на сайце “Белкаапзнешгандлю”. Аднак у прыёмнай прадпрыемства паведамляюць, што функцыі кіраўніка часова выконвае намеснік Забродскага.

Згодна з матэрыяламі справы, падсудны чатыры разы сустракаўся з прадстаўніком фірмы “Свет піва” Калеснікавым, які здымаў з рахунку грошы пасля таго, як паступала пагашэнне доўгу. Хабар перадаваўся на аўтастаянках ў аўтамабілях Lexus і Toyota Land Cruiser Prado. Агульная сума незаконнага ўзнагароджання — 15 тысяч рублёў (прыблізна 7,5 тыс. долараў).

Затрымалі Забродскага 3 мая 2017 года падчас атрымання апошняга хабару. Вядома, што Калеснікаў праходзіць па справе як сведка, у той жа дзень ён напісаў заяву на імя старшыні КДБ, у якой выкрывае гендырэктара “Белкаапзнешгандлю”.

Пра затрыманне топ-менеджара прадпрыемства раней не паведамлялася. Яму выстаўленае абвінавачанне ў атрыманні хабару ў буйным памеры (ч. 2 арт. 430 КК). Калі віна Забродскага будзе даказаная, яму пагражае ад трох да дзесяці гадоў пазбаўлення волі з канфіскацыяй маёмасці.

Гэта не першы карупцыйны скандал у сістэме Белкаапсаюза. У 2015 годзе яго былы старшыня праўлення Сяргей Сіцько быў прыгавораны да 12 гадоў пазбаўлення волі за атрыманне хабару ў асабліва буйным памеры і злоўжыванне ўладай. Гаворка ішла пра “адкаты” пры вызначэнні “патрэбных пераможцаў” на тэндарах па продажы нерухомасці і рамонце будынкаў Белкаапсаюза.

“Белкаапзнешгандаль Белкаапсаюза” з’яўляецца асноўным аптовым прадпрыемствам Белкаапсаюза, займаецца імпартам і экспартам тавараў, аптовым і рознічным гандлем, грузаперавозкамі, дзейнасцю ў сферы грамадскага харчавання, а таксама вытворчасцю і рэалізацыяй вырабаў з натуральнага футра. Прадпрыемства абслугоўвае больш за 9 тысяч гандлёвых аб’ектаў, размешчаных практычна ва ўсіх населеных пунктах Беларусі.

Поделиться ссылкой: