Анатоль Лябедзька: “Захапіць Мінгарсавет мы не гатовы…”

29

Не выключана, што галасаванне адбудзецца 18 лютага. Менавіта гэтую дату старшыня ЦВК Лідзія Ярмошына назвала найбольш аптымальнай.

Да дня “ікс” засталося крыху больш за чатыры месяцы. Наколькі гатова АГП да ўдзелу ў выбарах?

– Анатоль Уладзіміравіч, ці збіраецца АГП браць удзел у гэтых выбарах?

– Спачатку давайце вызначымся з тэрміналогіяй. Для Лідзіі Ярмошынай гэта выбары, а для АГП – палітычная выбарчая кампанія. Розніца вельмі істотная. Бо выбары – гэта калі ўлічаны кожны голас. Выбары – гэта калі ты можаш абскардзіць несправядлівае рашэнне ў незалежным судзе. Выбары – гэта калі ва ўсіх удзельнікаў роўныя магчымасці. Выбары – гэта калі галасуюць бюлетэнямі, а не зацверджанымі пратаколамі.

А вось у выбарчай кампаніі наша партыя ўдзельнічаць будзе. Хаця б дзеля таго, каб паказаць беларусам, што альтэрнатыва ёсць. Ёсць праграма па вырашэнні эканамічных праблем, ёсць ідэі наконт таго, як стварыць у Беларусі новыя працоўныя месцы.

Не скажу, што кандыдатаў ад АГП будзе шмат. Для нас гэта валанцёрская кампанія. Тым, хто выкажа жаданне ў ёй паўдзельнічаць, я пацісну руку.

– Цягам некалькіх апошніх электаральных кампаній стратэгія АГП паўтараецца. Партыйныя кандыдаты камунікуюць з выбаршчыкамі – і на гэтым кропка. Ці азначае гэта, што “захапіць уладу”, напрыклад, у Мінскім гарадскім Савеце дэпутатаў АГП не збірацца? Хаця б для таго, каб не скардзіцца на тое, што ўлада адпраўляе мітынгоўцаў праводзіць пратэстныя акцыі на “сабачую пляцоўку” ў раёне плошчы Бангалор…

– Якім чынам “захапіць” Мінгарсавет? Уварвацца туды з матросамі, фермерамі і прадпрымальнікамі і ўсесціся ў крэслы? Як сведчыць гісторыя, сцэнар такога захопу недаўгавечны. Мы за тое, каб улада абіралася на сумленных выбарах.

– А што вы, ваша партыя зрабілі для таго, каб выбары ў Беларусі сталі сумленнымі? Можа, выйшлі да будынка Цэнтрвыбаркама і галадалі, патрабуючы змен у выбарчае заканаўства?

– Галадоўка ў Беларусі – не той сродак. Бо, гледзячы на таго, хто стаіць з плакатам на плошчы, беларускі чыноўнік не адмаўляецца ад таго, каб закладваць за абедзве шчакі чорную ікру… На эмоцыі і дзеянні беларускага чыноўніка від галадаючага чалавека ніяк не ўплывае.

Дамагаючыся змен у выбарчае заканадаўства Беларусі, мы пайшлі іншым шляхам. Па-першае, менавіта мы былі ініцыятарамі таго, каб пад патрабаваннямі змен у выбарчае заканадаўства падпісаліся ўсе кіраўнікі дэмакратычных беларускіх партый. Па-другое, мы правялі вялікую работу з міжнароднымі экспертамі, якія далі заключэнне, што так, змены, якіх дамагаюцца беларускія дэмакраты, слушныя. І, па-трэцяе, лічу, што АГП напоўніцу выкарыстала дэпутацкі мандат Ганны Канапацкай. Мы разам з нашым дэпутатам Палаты прадстаўнікоў прайшлі ўвесь шлях бюракратычнай цяганіны, каб вынесці пытанне аб змене выбарчага заканадаўства на бліжэйшую сесію. І гэта пытанне будзе там абмяркоўвацца. Няма ілюзій, што калегі Канапацкай ініцыятыву падтрымаюць, але пад ляжачы камень вада не цячэ…

– На ваш погляд, ці магчымы варыянт, калі нехта з сябраў АГП пераможа на выбарах нават у цяперашніх умовах?

– Улада працягне сваю гульню з Захадам. Не выключана, што кагосьці з прадстаўнікоў апазіцыі аб’явяць дэпутатам дзеля таго, каб сказаць: навошта нам мяняць выбарчае заканадаўства, калі і па гэтым апазіцыя перамагае? Гэта такая гульня ў “паўзучую” дэмакратыю. Але гэта не адмяняе галоўнага: Беларусі трэба вярнуць сапраўдныя выбары. І, можа быць, высілкаў адной АГП тут мала…


Няма запісаў для адлюстравання