«Офіс зарэгістраваны як структурнае падраздзяленне ТБМ «Універсітэт «Альбарутэнія». Ён знаходзіцца на адрасе: вуліца Шчарбакова, 32, — сказаў Трусаў. — На днях мы туды завязем мэблю і будзем далей працаваць — пададзім на рэгістрацыю статут універсітэта, а затым будзем падаваць дакументы для атрымання ліцэнзіі на права вядзення адукацыйнай дзейнасці».

Трусаў мяркуе, што на ўсе фармальнасці можа пайсці прыблізна год. У выпадку атрымання ўсіх неабходных дакументаў і дазволаў ва ўніверсітэце спачатку пачне працу магістратура, куды плануецца прыняць 200-300 студэнтаў. Паводле слоў Трусава, на першым этапе неабходна падрыхтаваць магістраў, якія пасля заканчэння змогуць стаць выкладчыкамі ўніверсітэта для студэнтаў-бакалаўраў.

«У нас ёсць выкладчыкі, у тым ліку тыя, хто раней працаваў у Еўрапейскім гуманітарным універсітэце, якія будуць выкладаць на беларускай мове, — сказаў Трусаў. — Арыентацыя ў нас будзе на класічны ўніверсітэт з апорай на гуманітарныя навукі. Не выключаю, што таксама будзе падрыхтоўка ў IT-сферы, юрыстаў, па некаторых медыцынскіх спецыяльнасцях».

Трусаў упэўнены, што ўніверсітэт будзе карыстацца «велізарным попытам».

Фінансаванне пакуль бярэ на сябе ТБМ. «200 рублёў у месяц за арэнду офіса мы аплацім, — сказаў Трусаў. — А ў далейшым будзем шукаць спонсараў і плюс аплата за навучанне».

За стварэнне нацыянальнага ўніверсітэта з беларускай мовай навучання актыўна выступае дэпутат Палаты прадстаўнікоў Алена Анісім, намесніца старшыні ТБМ.