Анлайн-дадатак да газеты
"Народная Воля"

Сёння пачынаюцца беларуска-расійскія стратэгічныя вучэнні "Захад-2017". Іх тэма — "Падрыхтоўка і прымяненне груповак войскаў у інтарэсах забеспячэння ваеннай бяспекі Саюзнай дзяржавы".
99
Памер шрыфта
Фота: yandex.by

Вучэнні пройдуць на шасці палігонах у Беларусі (Барысаўскім, Даманаўскім, Ружанскім, Лепельскім, Ласвіда і Асіповіцкім), а таксама ў раёне Дрэтуні і Глыбокага (Віцебская вобласць), і на трох палігонах у Расіі.

Паводле апошніх дадзеных Мінабароны Беларусі, на беларускай тэрыторыі будзе задзейнічана 10 тысяч 175 ваеннаслужачых, у тым ліку 3 тысячы 100 — расійскіх, 138 танкаў (у тым ліку 98 расійскай арміі), баявых браніраваных машын — 231 (104), артылерыйскіх сістэм і рэактыўных сістэм залпавага агню — 142 (32), самалётаў і верталётаў — 49 (27).

Расійская авіяцыя перабазавалася на беларускія аэрадромы 12 верасня.

Заяўленыя мэты вучэнняў гучаць так: удасканаленне аператыўнай сумяшчальнасці штабоў розных узроўняў, а таксама спалучэнне перспектыўных сістэм кіравання войскамі і зброяй; апрабацыя палажэнняў новых статутных дакументаў, распрацаваных ва ўзброеных сілах Расіі і Беларусі; атрыманне практыкі камандуючымі, камандзірамі і штабамі па планаванні мерапрыемстваў ваеннага характару па стабілізацыі становішча і кіраванні войскамі ў ходзе іх правядзення.

Як заявіў 29 жніўня кіраўнік вучэнняў з беларускага боку начальнік Генеральнага штаба Узброеных сіл Беларусі генерал-маёр Алег Белаконеў, задума вучэнняў улічвае «сучасныя падыходы да прымянення войскаў на аснове вопыту ўзброеных канфліктаў апошніх гадоў, мерапрыемстваў аператыўнай падрыхтоўкі, а таксама форм і спосабаў прымянення войскаў, выпрацаваных ва ўзброеных сілах дзвюх дзяржаў».

Паводле яго слоў, зыходзячы з падзей, якія адбываюцца ў краінах Блізкага Усходу і Еўропе, у аснову задумы вучэнняў пакладзены адзін з такіх варыянтаў узнікнення крызіснай сітуацыі і нарастання канфлікту, звязаных з узрастаннем актыўнасці незаконных узброеных фарміраванняў, міжнародных сепаратысцкіх і тэрарыстычных арганізацый, якія маюць знешнюю падтрымку.

Бакі, якія проціборнічаюць, умоўна размешчаны ў межах рэальных межаў Беларусі. Паводле задумы вучэнняў, з аднаго боку дзейнічаюць «паўночныя», якія ўключаюць Саюзную дзяржаву, з другога — «заходнія»: кааліцыя зацікаўленых дзяржаў (выдуманыя краіны Вейшнорыя, Весбарыя, Лубен). Умоўная дзяржава Вейшнорыя размешчана ў паўночна-заходняй частцы рэальнай тэрыторыі Беларусі.

У аснову розыгрышаў практычных эпізодаў пакладзены варыянты сумесных дзеянняў беларускіх і расійскіх часцей і падраздзяленняў, якія ўваходзяць у склад рэгіянальнай групоўкі войскаў, пры ўдзеле ў прыкрыцці участкаў дзяржмяжы, ахове і абароне ваенных аб’ектаў, блакаванні і ліквідацыі дыверсійна-разведвальных груп і незаконных узброеных фарміраванняў, а таксама вядзенні абарончага бою ў выпадку ўварвання на тэрыторыю Саюзнай дзяржавы.

Вучэнні пройдуць у два этапы. На першым этапе (14—16 верасня) аб’яднаным камандаваннем рэгіянальнай групоўкі войскаў «мяркуецца ажыццявіць завяршэнне падрыхтоўкі войскаў да баявога прымянення па ізаляцыі раёнаў дзеянняў незаконных узброеных фарміраванняў і дыверсійна-разведвальных груп праціўніка, нарошчванне групоўкі ВПС і войскаў СПА для прыкрыцця важных дзяржаўных і ваенных аб’ектаў, падрыхтоўку да адбіцця магчымай агрэсіі, а таксама адпрацоўку пытанняў арганізацыі ўсебаковага забеспячэння створаных груповак войскаў».

На другім этапе (17—20 верасня) плануецца адпрацаваць пытанні кіравання войскамі ў ходзе вядзення ваенных дзеянняў пры адбіцці агрэсіі супраць Саюзнай дзяржавы ва ўмовах сітуацыі, якая хутка змяняецца, арганізацыі ўзаемадзеяння і ўсебаковага забеспячэння ў інтарэсах вырашэння пастаўленых задач.

Вучэнні плануюць сумесна праінспектаваць Аляксандр Лукашэнка і Уладзімір Пуцін. Як паведаміў журналістам 1 верасня прэс-сакратар прэзідэнта РФ Дзмітрый Пяскоў, кіраўнікі дзяржаў маюць намер наведаць ваенны палігон у адным з расійскіх рэгіёнаў.

Чакаецца, што за вучэннямі будуць сачыць каля 80 замежных назіральнікаў ад Латвіі, Літвы, Польшчы, Украіны, Эстоніі, Швецыі і Нарвегіі, ААН, АБСЕ, НАТА, СНД, АДКБ, Міжнароднага камітэта Чырвонага Крыжа, а таксама акрэдытаваныя ў Мінску ваенныя аташэ.

Беларускае ваенна-палітычнае кіраўніцтва неаднаразова заяўляла, што вучэнні носяць выключна абарончы характар і што расійскія вайскоўцы пакінуць тэрыторыю Беларусі да 30 верасня. У гэтым сумняваюцца прадстаўнікі Захаду і беларуская апазіцыя, якія асцерагаюцца, што пасля вучэнняў расійскія войскі могуць застацца на тэрыторыі Беларусі.

8 верасня ў Мінску прайшлі вулічныя акцыі супраць вучэнняў «Захад-2017». Дэманстранты выказалі пратэст уцягванню Беларусі ў супрацьстаянне Расіі з Украінай і НАТА, а таксама заявілі аб сваёй гатоўнасці «бараніць незалежнасць Беларусі са зброяй у руках».

Крынiца: БелаПАН
Тэмы:, ,
Каб чытаць больш цікавых і актуальных артыкулаў, купляйце PDF-версію газеты!
Хуткая аплата праз смс-сервіс

Чытайце таксама

20 верасня 2017

Да канца 2017-га Беларусь і Расія могуць увесці ўзаемнае прызнанне візаў

Да канца 2017 года плануецца ўвесці ўзаемнае прызнанне візаў і вырашыць праблему з пропускам замежнікаў праз беларуска-расійскую мяжу.
15 верасня 2017

“Мяне забралі ў пастарунак за тое, што фатаграфаваў збаны…”

Вучэнні “Захад-2017” пачаліся. Відавочна, беларускія вайскоўцы атрымалі загад: праяўляць павышаную пільнасць. У гэтым на ўласным вопыце пераканаўся калекцыянер рэдкіх узораў шкляной тары з Мар’інай Го
15 верасня 2017

Падзяка Леніну

Тры гады таму на сонечна-сланечнікавай Чаркашчыне мне давялося назіраць, як падаў з п’едэстала чарговы Ленін. Украіна размашыста адзначала 200-годдзе Шаўчэнкі, хоць з-за вайны на ўсходзе паўсюль на ск