Як паведамляе пасольства Францыі ў Беларусі, спектакль прадставяць публіцы ў рамках VII Міжнароднага форуму тэатральнага мастацтва «ТЭАРТ», які пройдзе ў беларускай сталіцы з 27 верасня па 16 кастрычніка.

Паказ адбудзецца 28 верасня ў Палацы культуры Мінскага аўтазавода.

«Французскі харэограф Анжален Прэльжакаж ужо неаднойчы ў сваёй творчасці звяртаўся да тэмы казак і паданняў розных народаў і культур, і ў гэты раз у сваім спектаклі «Фрэска. Карціна на сцяне» ён звяртаецца да незвычайна паэтычна фальклору Азіі, — адзначылі ў пасольстве Францыі. — Ён пераносіць гледачоў у фантастычны свет кітайскіх казак і раскрывае неверагодную сілу выяўленчага мастацтва. Рэжысёр не імкнецца пераказаць старажытнае кітайскае паданне, а стварае яго сучасную адаптацыю і пераносіць дзеянне п’есы ў прастору на скрыжаванні розных культур, захоўваючы пры гэтым дух і сімвалізм старажытнай гісторыі».

Анжален Прэльжакаж пачынаў свой творчы шлях з класічнага балета, а затым захапіўся сучасным танцам і вучыўся яму ў вядомага харэографа Мерса Канінгема. З 1984 года спектаклі Прэльжакажа — у рэпертуары тэатраў па ўсім свеце, сярод якіх «Ла Скала» ў Мілане, «Нью-Ёрк Сіці балет» і «Балет Парыжскай оперы». За сваю кар’еру Прэльжакаж быў удастоены мноства ўзнагарод, сярод якіх ордэн Ганаровага легіёна і нацыянальны ордэн Францыі «За заслугі».