Аб гэтым паведамляе праваабарончы сайт spring96.org.
Мікалай Міхалькоў быў затрыманы 24 сакавіка, праз тры дні пасля затрымання па гэтай жа справе яго сына Яна Міхалькова. Спачатку Міхалькова-старэйшага змясцілі ў следчы ізалятар КДБ, дзе выставілі абвінавачанне на падставе ч. 3 арт. 293 Крымінальнага кодэкса (навучанне ці іншая падрыхтоўка асобаў для ўдзелу ў масавых беспарадках), затым перавялі ў СІЗА № 1 на Валадарскага.

Паводле інфармацыі праваабаронцаў, перадае БелаПАН, Мікалай Міхалькоў з’яўляецца адным з трох фігурантаў гэтай крымінальнай справы, каму не выстаўленае дадатковае абвінавачанне (стварэнне незаконнага ўзброенага фармавання).

Ян Міхалькоў быў вызвалены з-пад варты ў канцы красавіка.

На гэты момант за кратамі паводле падазрэння ў падрыхтоўцы “масавых беспарадкаў” застаюцца 17 чалавек. Усе яны, за выключэннем Сяргея Кунцэвіча (паплечнік апазіцыйнага палітыка Мікалая Статкевіча), былі якім-небудзь чынам звязаныя са спартыўна-патрыятычнай арганізацыяй “Белы легіён”, якая спыніла сваю дзейнасць 15 гадоў таму, альбо яе актывістамі.

Затрыманні паводле абвінавачання ў падрыхтоўцы беспарадкаў пачаліся пасля таго, як Аляксандр Лукашэнка 21 сакавіка заявіў аб “баевіках, якія рыхтуюць правакацыю са зброяй”. 23 сакавіка дзяржаўныя тэлеканалы паведамілі, што КДБ распачаў крымінальную справу па факце навучання і падрыхтоўкі да ўдзелу ў масавых беспарадках. Першапачаткова былі затрыманыя 26 чалавек — былыя актывісты “Белага легіёна”, афіцыйна зарэгістраванага бабруйскага клуба “Патрыёт” і не зарэгістраванага “Маладога фронту”. Пазней некаторых адпусцілі пад падпіску аб нявыездзе.

Афіцыйнай інфармацыі пра ход расследавання гучнай справы па-ранейшаму няма. 11 мая Беларуская асацыяцыя журналістаў заклікала генеральнага пракурора, а таксама кіраўнікоў КДБ і Следчага камітэта інфармаваць грамадскасць аб расследаванні гэтай і іншых рэзанансных спраў.