Па дадзеных следства, 33-гадовая жыхарка Віцебска ў кастрычніку 2014 года ў ліфце жылога дома прачытала аб’яву аб зняцці псоты і лячэнні ад хвароб. У выніку некалькіх сустрэч з аўтарам аб’явы, жанчына спыніла зносіны з «лекаркай». Але неўзабаве жанчыне патэлефанавала дачка «знахаркі» – 37-гадовая Рада – з прапановай дапамагчы ў лячэнні ад эпілепсіі. У выніку наступных сустрэч Рада запэўніла аб наяўнасці ў сябе такіх здольнасцяў і праводзіла розныя дарагія абрады па зняцці псуты, для якіх неабходны былі грашовыя сродкі.

Жанчына таксама ўдзельнічала ў абрадах «спальвання» грашовых сродкаў, паведамляе “НН“, якія на суму 2 200 рублёў і за 1 500 даляраў ЗША перадала падазраванай.

Акрамя таго, падазраваная завалодала 14 залатымі вырабамі пацярпелай, якія нібыта трэба было пачысціць. Пасля таго, як пацярпелая прайшла лячэнне ў бальніцы і папрасіла вярнуць яе ўпрыгожванні, Рада паведаміла, што яна правяла з імі абрад і выкінула завушніцы, ланцужкі, кулоны і кольцы ў раку.

Агулам, з лістапада 2014 года па май 2015 года падазраваная шляхам падману завалодала грашымі пацярпелай — 1 000 еўра, 3 750 даляраў ЗША, больш за 12 000 рублёў, паведамляюць следчыя.

У ліпені 2016 года «лекарку Раду» знайсці не змаглі і абвесцілі ў вышук. У красавіку 2017 года жанчыну затрымалі ў Мінску. Цяпер яна знаходзіцца пад вартай.

«Лекарцы» прад’яўлена абвінавачванне ў махлярстве, здзейсненым ў асабліва буйным памеры. Максімальнае пакаранне па гэтым артыкуле — 10 гадоў пазбаўлення волі.

У матэрыялах крымінальнай справы маюцца звесткі аб трох падобных фактах махлярства ў 2015 годзе, здзейсненых падазраванай Радай Уладзіміраўнай Метнкоўскай у дачыненні да жыхароў Віцебска. Гэтыя факты правяраюць следчыя.

Следчы камітэт звяртаецца да грамадзян, якім што-небудзь вядома аб супрацьпраўнай дзейнасці Метнікоўскай Рады Уладзіміраўны, або якія сталі пацярпелымі ад яе ашуканскіх дзеянняў. Следчыя заклікаюць звярнуцца ў Віцебскі гарадскі аддзел Следчага камітэта па адрасе: горад Віцебск, праспект Маскоўскі, 51А або патэлефанаваць па тэлефоне 8 ( 0212) 46-21-61.

«Лекарка» Рада. Фота — Следчы камітэт