ЕС: Рост смяротных прысудаў супярэчыць заяўленай гатоўнасці Беларусі ўзаемадзейнічаць з міжнароднай супольнасцю

 

У заяве адзначаецца, паведамляе БелаПАН, што 19 мая Гомельскі абласны суд вынес смяротны прысуд Сяргею Вострыкаву. “Гэта ўжо трэці смяротны прысуд, вынесены беларускім судом ў 2016 годзе. Ён быў вынесены ўслед за прыведзеным у выкананне ў красавіку смяротным прысудам у дачыненні да Сяргея Іванова і пакіданнем у сіле яшчэ трох смяротных прысудаў, вынесеных у папярэднія гады”, — канстатуе Качыянчыч.

Паводле яе слоў, рост колькасці новых і пакінутых у сіле смяротных прысудаў у Беларусі ў апошнія некалькі месяцаў супярэчыць заяўленай гатоўнасці краіны ўзаемадзейнічаць з міжнароднай супольнасцю, у тым ліку з Еўрасаюзам, па гэтай праблеме, а таксама разгледзець пытанне ўвядзення мараторыя на прымяненне смяротнай кары. “Апошняе таксама з’яўляецца абавязацельствам, узятым на сябе Беларуссю ў адказ на рэкамендацыі Савета ААН па правах чалавека ў межах Універсальнага перыядычнага агляду”, — падкрэслівае прэс-сакратар Еўрапейскай службы знешніх дзеянняў.

“Сусветны вопыт паказаў, што смяротнае пакаранне не з’яўляецца фактарам, які стрымлівае злачыннасць, і менавіта таму многія краіны адмовіліся ад яго прымянення. Больш за тое, выкананне смяротнага прысуду ў дачыненні да чалавека, незалежна ад таго, за што ён асуджаны, з’яўляецца жорсткім і непрымальным адмаўленнем яго годнасці і недатыкальнасці”, — гаворыцца ў заяве Качыянчыч.

Нагадаем, з 1991 года ў Беларусі прыгавораныя да расстрэлу больш за 400 чалавек. Толькі адзін асуджаны быў памілаваны кіраўніком дзяржавы.