Як паведамляе прэс-служба МЗС, «падчас сустрэчы абмеркаваны бягучы стан і перспектывы развіцця адносінаў паміж Беларуссю і Еўрапейскім саюзам, шляхі актывізацыі супрацоўніцтва па лініі Беларусь — Савет Еўропы, падрыхтоўка шэрагу сумесных мерапрыемстваў».

Нагадаем, 14 студзеня Андрэа Рыгоні ў сувязі з вынясеннем у Беларусі новага смяротнага прысуду ад імя ПАСЕ зноў заклікаў беларускія ўлады «ўвесці мараторый на смяротнае пакаранне ў якасці першага кроку па яе адмене». Ён нагадаў, што «Беларусь застаецца адзінай краінай у Еўропе, дзе ўсё яшчэ ўжываецца смяротнае пакаранне». Спецдакладчык таксама падкрэсліў, што рашэнне аб увядзенні мараторыя на смяротнае пакаранне, якое можа быць прынятае ў любы момант прэзідэнтам, парламентам ці Канстытуцыйным судом Беларусі, прадэманстравала б «не толькі прагрэс у галіне абароны правоў чалавека, перадае БелаПАН, але і таксама жаданне ўладаў палепшыць адносіны з еўрапейскімі арганізацыямі».

Кіраўнік дэлегацыі Нацыянальнага сходу па ажыццяўленні кантактаў з ПАСЕ Мікалай Самасейка браў удзел у пасяджэнні камісіі па палітычных пытаннях і дэмакратыі, якое прайшло ў Страсбургу 28 студзеня ў межах зімовай сесіі ПАСЕ. Пасля вяртання ў Мінск ён заявіў журналістам, што рана ці позна Беларусі давядзецца разгледзець пытанне аб смяротнай кары для аднаўлення статусу спецыяльнага запрошанага ў Парламенцкай асамблеі Савета Еўропы.

Беларусь атрымала статус спецыяльнага запрошанага 16 верасня 1992 года, а 13 студзеня 1997 года была яго пазбаўленая, паколькі Бюро асамблеі не прызнала адпаведнымі міжнародным стандартам умовы правядзення і вынікі канстытуцыйнага рэферэндуму, які адбыўся 24 лістапада 1996 года. У чэрвені 2009 года ПАСЕ прыняла рэзалюцыю, у якой гаворыцца, што статус спецыяльнага запрошанага будзе вернуты беларускаму парламенту толькі пасля ўвядзення ў краіне мараторыя на смяротнае пакаранне.

 
Фото: trend.az