Лукашэнка: Бяспека і стабільнасць з'яўляюцца найвышэйшымі каштоўнасцямі беларускага народа

5

“Аддаючы даніну павагі вайскоўцам ўсіх пакаленняў, мы памятаем, якой цаной нам дасталіся мір і спакой на нашай зямлі”, — цытуе беларускага кіраўніка яго прэс-служба.

Лукашэнка адзначыў, што ў свеце працягваецца эскалацыя глабальнай напружанасці. На яго думку, падзеі апошніх гадоў асабліва наглядна дэманструюць, што свет ўвайшоў у новую рэальнасць, дзе канфрантацыя не спыняецца ні на хвіліну, піша БелаПАН.

“Сістэматычнае выкарыстанне гвалтоўных метадаў у неваенных сферах (асабліва фінансавай, эканамічнай, інфармацыйнай) змяніла сутнасць сучаснай вайны, — сказаў Лукашэнка. — Яе элементы, якія раней прайшлі абкатку ў Югаславіі, Іраку і Лівіі, у поўнай меры ўжываюцца і сёння. Гэта бачым на прыкладах Сірыі, Украіны і іншых дзяржаў. Усе ваенныя канфлікты апошніх гадоў дэманструюць адну асаблівасць. Гаворка ідзе пра рэалізацыю знешніх пагроз праз ўнутраныя крыніцы. Як правіла, завяршаюцца зменай улады і разбурэннем дзяржаў”.

“Такі сцэнарый для нас непрымальны. Хоць спробы навязаць яго Беларусі былі”, — заявіў Лукашэнка.

Ён адзначыў, што асноўныя палажэнні ваеннай дактрыны Беларусі перагледжаныя ў адпаведнасці з існымі выклікамі і патэнцыяльнымі пагрозамі бяспецы дзяржавы. “У ёй, як і ў ранейшай, захаваная абарончая скіраванасць, — сказаў Лукашэнка. — Заяўлена пра гатоўнасць у адстойванні сваіх нацыянальных інтарэсаў правядзеннем комплексу мер стратэгічнага стрымлівання з мэтай недапушчэння нападу, а ў выпадку развязвання агрэсіі — рашучым прымяненнем ваеннай сілы”.

У дактрыне таксама вызначаныя меры па арганізацыі ваеннай бяспекі краіны на сучасным этапе і асноўныя напрамкі будаўніцтва ваеннай арганізацыі дзяржавы. “Несумненна, гэтыя меры будуць рэалізаваныя на практыцы, і для гэтага ёсць усё неабходнае, — сказаў Лукашэнка. — Па-першае, высокі патрыятызм нашага народа. Па-другое, здольнасць Узброеных сіл адстаяць суверэнітэт і незалежнасць. Па-трэцяе, усенародная павага да людзей у пагонах”.

Як паведамлялася раней, Палата прадстаўнікоў плануе разгледзець законапраект аб новай ваеннай дактрыне на чарговай сесіі, якая адкрыецца 4 красавіка.

Поделиться ссылкой: