Мінінфарм пра Дабравольскага: Дзейнасць журналіста павінна ажыццяўляцца згодна з законам і ў межах нормаў прафэтыкі

1
Міністр Лілія Ананіч нагадвае аўтарам звароту, што закон аб СМІ “не толькі дае журналістам пэўныя правы, але і накладвае абавязак паважаць правы і законныя інтарэсы іншых асоб, выконваць заканадаўства”, паведамляе БелаПАН.

“Разам з тым, паводле інфармацыі, пададзенай Міністэрствам унутраных спраў <…>, падчас інцыдэнту ў будынку суда Фрунзенскага раёна г. Мінска Дабравольскі П. П. перашкаджаў супрацоўнікам міліцыі выконваць свае службовыя абавязкі, што з’явілася падставай для яго прыцягнення да адміністрацыйнай адказнасці на падставе арт. 23.34 Кодэкса Рэспублікі Беларусь аб адміністрацыйных правапарушэннях”, — піша Ананіч.

“З улікам вышэйсказанага” Мінінфарм “падкрэслівае, што дзейнасць журналіста павінна ажыццяўляцца ў строгай адпаведнасці з дзейным заканадаўствам <…> і ў межах нормаў прафесійнай этыкі”.

Зварот прадстаўнікоў СМІ быў перададзены ў Мінінфарм 1 лютага. Аўтары прасілі ведамства выказацца з нагоды недапушчальнасці перашкодаў прафесійнай дзейнасці журналістаў, рэалізацыі права грамадзян на атрыманне поўнай, дакладнай i своечасовай інфармацыі і давесці сваю пазіцыю да МУС і яго структурных падраздзяленняў.

25 студзеня ў судзе Фрунзенскага раёна Мінска ў пачатку пасяджэння па “справе графіцістаў” актывісты Павел Сяргей і Максім Шыцік разгарнулі транспарант з надпісам “Не палітычным пераследам”. Пры гэтым яны крычалі: “Мастацтва не злачынства!” Іх вывелі з залы суда. Разам з імі быў затрыманы Павел Дабравольскі. Адразу пасля затрымання ўсіх трох збілі ў суседнім пакоі, пасля чаго даставілі ў РУУС, склалі пратаколы аб адміністрацыйных правапарушэннях, а затым аштрафавалі у тым жа судзе Фрунзенскага раёна на падставе арт. 17.1 (дробнае хуліганства) і арт. 23.34 (непадпарадкаванне законнаму патрабаванню службовай асобы) КоАП.

Увечары 25 студзеня Дабравольскі і Шыцік напісалі заяву ў міліцыю на дзеянні супрацоўнікаў АМАП, а на наступны дзень знялі пабоі ў Дзяржаўным камітэце судовых экспертыз. 26 студзеня аддзел інфармацыі і грамадскіх сувязяў ГУУС апублікаваў каментарый, згодна з якім Павел Дабравольскі “перашкаджаў законным дзеянням супрацоўнікаў міліцыі” і не рэагаваў на іх заўвагі.

30 студзеня ля будынка Вярхоўнага суда прайшла несанкцыянаваная акцыя салідарнасці са збітымі ў судзе і супраць гвалту з боку міліцыі. У ёй узялі ўдзел прыблізна 15 чалавек. У дачыненні да дзевяці былі складзеныя пратаколы аб адміністрацыйным правапарушэнні.

7 лютага ў эфіры тэлеканала “Беларусь 1” Лілія Ананіч заявіла, што Міністэрства інфармацыі дасць адказ на зварот з нагоды інцыдэнту ў судзе. “Самае галоўнае, — сказала яна, — што мы атрымалі афіцыйны адказ з Міністэрства ўнутраных спраў, які яскрава сведчыць аб парушэнні працэсуальнага заканадаўства і прымяненні законных мер уздзеяння на ўдзельнікаў гэтага інцыдэнту”.

“Журналіст не можа быць актыўным бокам канфлікту. Калі такое атрымліваецца, значыць, гэта не журналістыка, значыць, гэта нейкія дзеянні, скіраваныя на дыскрэдытацыю прафесіі, а не на атрыманне інфармацыі”, — лічыць Ананіч.

10 лютага міністр юстыцыі Алег Сліжэўскі заявіў, што каментаваць інцыдэнт з Дабравольскім “не зусім карэктна”, бо ён не ведае ўсіх дэталяў. “Адзінае, тое, што я сам чытаў са сродкаў масавай інфармацыі, наколькі я зразумеў, дзеянні [амапаўцаў] былі ў пэўнай ступені справакаваныя, і супрацоўнікі прымалі меры ў межах сваіх паўнамоцтваў. Але ацэньваць тое, што адбылося, проста так, зыходзячы з інфармацыі, якая паступае з СМІ, я, безумоўна, не магу. Бо ацэнка ў гэтай сітуацыі павінна давацца кампетэнтнымі органамі”, — сказаў кіраўнік Мінюста.

Скарга Дабравольскага на рашэнне суда першай інстанцыі будзе разгледжаная 1 сакавіка ў Мінскім гарадскім судзе.

Як паведаміла Беларуская асацыяцыя журналістаў, аўтары звароту ў Мінінфарм збіраюцца накіраваць паўторны ліст з пералікам усіх фактаў збівання журналістаў за апошнія 10 гадоў.

.

Поделиться ссылкой: