Яго пакаралі зняволеннем на 6 гадоў, абвінаваціўшы ў арганізацыі масавых беспарадкаў, якія, па версіі абвінавачання, мелі месца ў беларускай сталіцы 19 снежня 2010 года ў дзень галасавання на прэзідэнцкіх выбарах.

“Грамадскі дзеяч з эмацыйнай, дынамічнай манерай паводзінаў”, — так аб ім напісана ў зборніку “Хто ёсць хто ў Беларусі”.

20 гадоў таму падчас путчу ГКЧП на шматтысячным мітынгу  Мікалай Статкевіч абвясціў аб стварэнні Беларускага згуртавання вайскоўцаў. У 90-я гэты рух карыстаўся аўтарытэтам у народа.

За месяц да абароны доктарскай дысертацыі падпалкоўніка Статкевіча звольнілі з войска.
Пасля гэтага Мікалая Статкевіча абралі старшынёй БСДГ, якая, аб’яднаўшыся з партыяй “Згода”, утварыла Сацыял-дэмакратычную партыю.

Пасля “Маршу свабоды” менавіта Мікалая Статкевіча і Валерыя Шчукіна прыцягнулі да крымінальнай адказнасці. Іх судзілі за арганізацыю несанкцыянаванай дэманстрацыі, якая прывяла да масавых беспарадкаў. Тады абышлося без зняволення. Пасля народных выступленняў у 2004 годзе супраць фальсіфікацыі вынікаў рэферэндуму яго і Паўла Севярынца пакаралі абмежаваннем волі. На волю палітык выйшаў толькі пасля прэзідэнцкіх выбараў 2006 года.

Мікалай Статкевіч свой дзень народзінаў сустракае ў Шклоўскай папраўчай калоніі. Туды яго паплечнікі і сябры могуць накіраваць свае віншаванні.

На волі ў палітвязня стары хворы бацька, дзве дачкі і ўнук.

Поделиться ссылкой: