Вуліца Калектарная 80 гадоў таму насіла іншую назву – Яўрэйская. Шэсце прысвечана адкрыццю Цэнтра Прагрэсіўнага Іудаізма Бэйт Сімха (Дом Радасці) на вуліцы Шорнай.

Напачатку шэсця адбудзецца мітынг на былых яўрэйскіх могілках каля помнікаў дэпартаваным і знішчаным у гады Другой сусветнай вайны яўрэям Германіі і Аўстрыі.

Арганізатарамі мітынгу выступілі прадстаўнікі Саюза беларускіх яўрэйскіх арганізацый і суполак. Удзел у цырымоніі возьмуць равіны з Беларусі, Ізраіля, Украіны і Расіі, ганаровыя госці з ЗША і Вялікабрытаніі, а таксама лідары яўрэйскай суполкі і Сусветнага Саюза Прагрэсіўнага Іўдаізма.

На мітынг запрошаны таксама прадстаўнікі праваслаўнай і каталіцкай канфесій, чыноўнікі Мінгарвыканкама і тыя, хто перажыў страты і быў сведкам жудасных падзей вайны.

Шэсце ўзначаляць равін з Ізраіля Ёль Осеран і Рыгор Абрамовіч. Світкі Торы вярнуцца на вуліцу, якая была некалі яўрэйскай, у яўрэйскі Цэнтр памяці Сандры Брэслаўэр.

У суполцы Прагрэсіўнага іўдаізму сёння больш за 3 000 сяброў.  



Поделиться ссылкой: