На гэты раз падставай для папярэджання сталі «парушэнні падатковага заканадаўства, якiя носяць доўгі характар». Арганізацыя павінна заплаціць у бюджэт звыш  205 млн рублёў падаткаў і штрафных санкцый па выкарыстаных у 2002-2003 гг. грантах Еўракамісіі, якія паводле міжнародных дамоваў Рэспублікі Беларусь падаваліся ў беспадатковым рэжыме. У рамках міжнароднай тэхнічнай дапамогі ад Еўракамісіі фінансаваліся больш за 30 грамадскіх аб’яднанняў, аднак падатковыя плацяжы былі налічаныя толькі ў дачыненні да двух арганізацый.

Лічачы рашэнне інспекцыі Міністэрства па падатках і зборах незаконным, БХК абскардзіў яго ў судовым парадку. Нацыянальныя суды ўсіх інстанцый пастанавілі, што праваабаронцы нічога не павінны пакрываць ў бюджэт. Аднак напярэдадні прэзідэнцкіх выбараў 2006 г., маніторынг якіх ажыццяўляў БХК, рашэнні гаспадарчых судоў былі перагледжаныя Прэзідыумам Вышэйшага Гаспадарчага Суда. Інспекцыя Міністэрства па падатках і зборах апісала і канфіскавала маёмасць БХК на суму 255 тысяч рублёў, рахункі арганізацыі арыштавалі. Разам з тым, у 2006 г. Дэпартамент фінансавых расследаванняў Камітэта дзяржкантролю спыніў ў сувязі з адсутнасцю падзеі злачынства крымінальную справу, узбуджаную за адхіленне ад выплаты падаткаў у дачыненні да службовых асоб БХК.

І вось цяпер Мінюст загадвае Беларускаму Хельсінкскаму Камітэту ліквідаваць запазычанасць у бюджэт у месячны тэрмін…

Нагадаем, што першае ў гэтым годзе папярэджанне было вынесена БХК 12 студзеня 2011 г. Мінюст звярнуў пільную ўвагу на дзейнасць аб’яднання пасля таго, як праваабаронцы накіравалі паведамленне пра ціск, аказваемым ўладамі на адвакатаў, якія ажыццяўляюць абарону абвінавачаных і падазраваных у арганізацыі масавых беспарадкаў 19 снежня 2010 і ўдзеле ў іх, а таксама аб іншых фактах пераследу і запалохвання адвакатаў у Беларусі Спецыяльнаму дакладчыку ААН па пытанні аб незалежнасці суддзяў і адвакатаў Габрыэле Кнауль. Міністэрства юстыцыі вывучыла паведамленне, накіраванае Г. Кнауль. На думку міністэрства, «меў месца распаўсюд недакладнай інфармацыі, якая дыскрэдытуе праваахоўныя органы і органы юстыцыі Рэспублікі Беларусь».

Поделиться: