Магчыма, сёння суддзя Святлана Акуліч вынясе рашэнне па справе. Учора ж суд паспеў апытаць ісца Наталлю Ільініч, дырэктара Талькаўскай школы Наталлю Меркуль, якая выступае адказчыкам па справе, а таксама сведкаў —  калег Ільініч па працы, былых выпускнікоў, былых калег і бацькоў дзяцей.

Пра тое, што справа гэта не звычайная, не радавы выпадак звальнення настаўніцы, сведчыць і тое, што ў грамадзянскім працэсе ўдзельнічае дарадца пракурора раёна Дзмітрый Цыкал. Па яго хадайніцтве трэцяй асобай па справе выступае раённы аддзел адукацыі, які прадстаўляе метадыст Таццяна Валасюк.

У іскавай заяве Наталля Ільініч патрабуе аднавіць яе на працы, спагнаць з наймальніка сярэдні заробак за час вымушанага прагулу, а таксама маральную кампенсацыю ў памеры 20 мільёнаў рублёў. Наталля робіць акцэнт на тым, што дырэктар Наталля Меркуль, прымаючы рашэнне не працягваць кантракт з ёй, парушыла адзін з пунктаў калектыўнага дагавора, у якім сказана, што з работнікамі, якія паспяхова і добрасумленна выконваюць службовыя абавязкі, не дапускаюць парушэнняў працоўнай дысцыпліны і маюць працяглы стаж працы, кантракт заключаецца тэрмінам ад 3 да 5 год.

Ільініч працавала ў Талькаўскай школе амаль 26 гадоў. Яна адна з чатырох настаўнікаў (усяго ў школе 19 настаўнікаў), якія маюць вышэйшую катэгорыю. Здавалася б, каму, як не Наталлі, вучыць дзяцей гісторыі!

Наталля Ільініч настойвае на тым, што яе звальненне з працы і адмова ў заключэнні з ёю новага працоўнага кантракта — палітычна матываванае рашэнне дырэктара.

Дырэктар Наталля Меркуль імкнулася пераканаць суд, што ніякай палітыкі тут няма, што ў працы Ільініч мелі месца парушэнні працоўнай дысцыпліны і таму яна вырашыла не працягваць з ёю працоўны кантракт. Але якія гэта парушэнні? Наталля рабіла памылкі ў школьным журнале, несвоечасова выставіла адзнакі за чвэрць у дзённік дзецям. У мінулым годзе ў Ільініч нават была вымова за тое, што адзнакі ў дзённікі яна выставіла са спазненнем. Але калі Меркуль прымала рашэнне не працягваць з настаўніцаў кантракт, гэтая вымова ужо была “пагашана”.

— Але такія памылкі робяць усе настаўнікі ў школе, — у адказ на абвінавачанні казала ў судзе Іліьініч. І нават прынесла копіі са школьных журналаў. Памылкі ёсць, аказваецца, і ў дырэктара Меркуль. Больш за тое, такая прынцыповая пазіцыя Меркуль — не мае права настаўнік вышэйшай катэгорыі рабіць памылкі ў дакументацыі — зусім паблякла, калі Наталля Ільініч заявіла хадайніцтва далучыць да справы копію яе працоўнай кніжкі. Высветлілася, што апошні запіс у ёй быў зроблены ў 2005 годзе, калі з Ільініч працягвалі кантракт да 2010 года. А ў 2010 годзе новы запіс адміністрацыя школы папросту зрабіць забылася. Што ж, дырэктара таксама трэба звальняць?!

Самы напружаны момант быў падчас сведчанняў калег Наталлі Ільініч — завуча Людмілы Місуна і настаўніцы нямецкай мовы Валянціны Аўдошчанкі. Па-першае, яны не пабаяліся прыйсці ў суд і засведчыць, што Ільініч — адзін з лепшых настаўнікаў школы, што такія промахі ў працы, якія дапускала Наталля, здараюцца ў рабоце амаль усіх педагогаў Талькаўскай школы. Што ж, цяпер усіх звальняць?! Па-другое, у судзе высветлілася, што рашэнне не працягваць кантракт дырэктар Наталля Меркуль прымала асабіста. Не параілася нават з завучам школы, якая працуе ў Талькаўскай СШ больш за 20 гадоў, не прыслухалася да просьбаў прафкама не звальняць Ільініч. Наталля Меркуль працуе ў школе толькі з верасня 2010 года (!) і ўзяла на сябе такое адказнае рашэнне — звольніла адну з лепшых настаўніц, па сутнасці выкінула яе на вуліцу, бо ўсім зразумела, што вясковаму педагогу ўладкавацца на працу вельмі складана.

Падчас сведчанняў супрацоўніц Талькаўскай школы высветліліся і іншыя цікавыя акалічнасці.

Падрабязнасці судовага працэсу — пазней на нашым сайце і ў заўтрашнім нумары “Народнай Волі”.

Калегі падтрымалі Ільініч. Што скажа суд? (фотарэпартаж)

Калегі падтрымалі Ільініч. Што скажа суд? (фотарэпартаж)

Калегі падтрымалі Ільініч. Што скажа суд? (фотарэпартаж)

Калегі падтрымалі Ільініч. Што скажа суд? (фотарэпартаж)

Калегі падтрымалі Ільініч. Што скажа суд? (фотарэпартаж)

Поделиться ссылкой: