Штраф памерам каля 40 тысяч даляраў фірме “Палёніка” быў прызначаны за тое, што фірма атрымлівала дапамогу ад “Вспульноты польскай”, арганізацыі якая падтрымлівае сувязі з палякамі па ўсім сьвеце, на заняткі польскай мовай і на падвышэньне кваліфікацыі настаўнікаў.

Суд палічыў, што фінансы ад “Вспульноты” трэба разглядаць як гуманітарную дапамогу, а не як гаспадарчую дамову, за якую належыць плаціць іншыя падаткі. Супрацоўнікі фірмы “Палёніка” катэгарычна не пагаджаюцца з такім рашэньнем.

Актывіст Саюза палякаў, Анджэй Пачобут кажа, што ў іх фірмы з “Вспульнотай польскай” была падпісаная гаспадарчая дамова, грошы пералічваліся ім на рахунак, зь іх бралі падаткі і раптам у адзін момант аб’явілі гэта гуманітарнай дапамогай. Ён кажа, што рашэньне суда нельга назваць юрыдычным і прыводзіць свае аргумэнты.

Пачобут: “Якім чынам суд прызнаў гуманітарнай дапамогай тое з чаго браліся падаткі? Чаму няма прыватнага азначэньня суда, каб пакараць тых чыноўнікаў, банк за тое, што браліся тыя грошы ў выглядзе падаткаў не за гуманітарную дапамогу, а як за гаспадарчае супрацоўніцтва”.

Анжаліка Арэхва, кіраўніца непрызнаванага ўладамі Саюза палякаў, кажа, што з пачатку года на курсах польскай мовы навучаліся да 400 чалавек. Пераважна гэта школьнікі з Горадні і Гарадзенскага раёна, аплата за курсы была сымбалічнай.

Арэхва: “280 тысяч за ўвесь курс навукі, гэта за 9 месяцаў людзі плацілі. Частку даплачвала “Вспульнота польская”, то яны гэта таксама палічылі гуманітарнай дапамогай. Ну відавочна, што гэта справа цалкам палітычная і няма чаго нават казаць”.

Анджэй Пачобут узгадвае, як праходзілі судовыя паседжаньні і распавядае, што ў залю не дапускалі нават іх адваката. Ён лічыць, што справа таксама носіць выключна палітычны характар. Яшчэ нядаўна беларускія ўлады, зь яго слоў, аб’явілі, што накіравалі справу ў архіў і раптам яна зноў усплывае ў судзе.

Пачобут: “Адзін раз у адзін бок хісьнецца беларуская ўлада, другі раз ужо ў супрацьлеглы бок. Як гэта патлумачыць? Гэта такая стратэгія? Ды няма ў іх ніякай стратэгіі, ёсьць нейкая тактыка: адзін раз так зробяць, а другі раз інакш”.

У судзе фірму “Палёніка” будуць прадстаўляць яе заснавальнікі: Анжаліка Борыс, яна дырэктар фірмы, Анжаліка Арэхва, цяпер кіраўнік непарызнаванага ўладамі Саюза палякаў і бухгальтар фірмы.

Поделиться ссылкой: