Як паведаміў БелаПАН прэс-сакратар абласнога ўпраўлення МНС Сяргей Машноў, 4 кастрычніка ў 22.52 у Пружанскі РАНС паступіла паведамленне аб ДТЗ на пуцеправодзе праз чыгуначныя пуці паміж вёскамі Лінава і Аранчыцы. Трактар “МТЗ-1221”, вадзіцель якога не справіўся з кіраваннем, упаў з моста на чыгуначныя пуці і перакуліўся. Вышыня падзення прыкладна шэсць метраў.

У кабіне трактара знаходзіліся сціснутыя дэфармаванымі канструкцыямі 58-гадовы механізатар і 46-гадовы пасажыр.

Супрацоўнікі пажарнай аварыйна-ратавальнай часці № 1 Пружан, якія прыбылі на месца здарэння, з дапамогай спецыяльнага абсталявання дасталі іх з кабіны. Абодва шпіталізаваныя ў Пружанскую цэнтральную раённую бальніцу. У трактарыста закрытая чэрапна-мазгавая траўма, страсенне галаўнога мозгу, удары; у пасажыра чэрапна-мазгавая траўма і ўдары. Яны жыхары вёскі Куплін, працуюць у мясцовым ААТ “Лінава”. Трактар, што належыць гэтаму прадпрыемству, атрымаў механічныя пашкоджанні.

Паводле слоў Машнова, з-за ДТЗ на участку чыгункі была затрымка руху трох пасажырскіх цягнікоў: № 196 Брэст — Масква (на 52 хвіліны); № 10 Варшава — Масква (на 1 гадзіну 18 хвілін); № 115 Мінск — Варшава (на 31 хвіліну).
“Сёлета падраздзяленні МНС Брэсцкай вобласці 176 разоў выязджалі на ліквідацыю наступстваў ДТЗ. З транспартных сродкаў выратаваны 32 чалавекі, з іх тры чалавекі — у кастрычніку”, — дапоўніў Машноў.

Поделиться ссылкой: