Зьбіраньне мыта на расейскую нафту, якая пастаўляецца ў Беларусь, супярэчыць базавым прынцыпам адзінай мытнай прасторы, заявіў намесьнік дырэктара дэпартамэнту зьнешнеэканамічнай дзейнасьці Міністэрства замежных спраў Антон Кудасаў.
Як падае БелаПАН, чыноўнік на прэс-канфэрэнцыі ў Менску нагадаў, што цяпер пастаўкі сырой нафты ў Беларусь рэгулююцца беларуска-расейскім міжурадавым пратаколам ад 27 студзеня 2010 году, які «легалізуе прымяненьне расейскім бокам гэтага мыта». «Гэты пратакол не адпавядае прававой базе Мытнага саюзу і тым дакумэнтам, якія прынятыя ў сувязі з рашэньнем прэзыдэнтаў Беларусі, Расеі і Казахстана стварыць адзіную мытную тэрыторыю з 1 ліпеня 2010 года», — падкрэсьліў Кудасаў.

Кудасаў таксама пракамэнтаваў інфармацыю некаторых расейскіх СМІ аб магчымым увядзеньні Расеяй увазнога мыта на прыродны газ. «Увядзеньне мыта памеру на прыродны газ, які пастаўляецца ў Беларусь, будзе зьяўляцца прамым парушэньнем дзеючых пагадненьняў паміж бакамі», — заявіў ён.

Паводле яго меркаваньня, неабходна правесьці трохбаковыя перамовы, якія павінны прывесьці да зразумелай сыстэмы экспарту нафты з Расіі ў Беларусь і Казахстан без зьбіраньня мыта. «Я спадзяюся, што такія перамовы найбліжэйшым часам будуць праведзены», — заявіў прадстаўнік МЗС.

Пры гэтым ён дадаў, што перамоўны працэс «будзе складаны».