Шарэнга

Як і належыць зуху-камандзіру:

Усім валютам

Выстраіцца ў рад

Па росту, так бы мовіць, і ранжыру!

Даляр амерыканскі, як заўжды,

У галаву шарэнгі "вострыць лыжы".

Ды Йена запярэчыла:

— Куды?

Ты не мацак даўно,

А хілы й хіжы.

Суседку-Йену падтрымаў Юань

(Яно было, прынамсі, нечакана):

— І сапраўды,

Які нахабнік, глянь:

Здыхляк,

А выдае сябе за пана.

Даляру надаваўшы кухталёў,

Ад галавы шарэнгі адштурхнулі.

Рубель расійскі

Рэй было павёў —

Яму таксама паказалі дулю.

На лідэрства

Прэтэнзіі свае

У той шарэнзе выставіў і Еўра.

Хоць і яму ўжо моцы не стае,

Ды ўсё-ткі прынялі асілкі ў хеўру.

Вось так яны і сталі напярод:

Юань, англійскі Фунт

І Еўра, Йена.

Астатні розны, выбачайце, зброд

Падсоўваўся бліжэй папераменна.

Карцела й беларускаму Рублю

Прыблізіцца хоць трохі да эліты.

Ды толькі "апускалі на зямлю"

Яго

І адштурхоўвалі:

— Ідзі ты!..

Ніхто не шанаваў чамусь Рубля —

Дзінары, Ліры, Латы, Куны, Кроны...

І нават Грыўна

Зыркала здаля

На вельмі ўжо малы

"Ранжыр" ягоны.

І ўрэшце Эканомікі ківок,

Валютнага, так мовіць, камандзіра:

— Ідзі, Рубель, у супрацьлеглы бок

І станавіўся ззаду,

Побач з Бырам.

Той эфіопскі Быр —

Зусім здыхляк.

Яго "аб'ехаць" —

Гонару нямнога.

Ды толькі наш Рубель

Падумаў так:

"Я не апошні —

Ну і слава Богу!"