Прэтэндэнт у кандыдаты Мікалай Расюк застаўся без працы

“Пасля працоўнага дня мне патэлефанавалі з аддзела кадраў і сказалі, што ў аўторак я магу прыходзіць за сваёй працоўнай кніжкай і што мне перавялі мой апошні заробак, які я магу зняць са сваёй пластыкавай карткі”, — расказаў Мікалай Расюк. Ён звязвае сваё звальненне з палітычнай і грамадскай дзейнасцю і будзе абскарджваць яго ў судзе.

“На працы я заўсёды змагаўся за правы працоўных, — гаворыць Мікалай, — бо будаўнічая галіна, гэта якраз тое месца, дзе парушаюцца ўсе правы працоўных, а гэта і аплата працы, і парушэнне тэхнікі бяспекі. Тут не працуюць ні законы, ні нарматыўна-тэхнічныя акты. Рабочыя працуюць, як рабы, па 10—12 гадзін замест агульнапрынятых васьмі, узамен на гэта начальства заплюшчвае вочы на п’янства рабочых”.

“З усімі рабочымі быў заключаны кантракт на тры гады, — гаворыць Мікалай Расюк, — са мной жа — на адзін год. Я бачу ў гэтым праяву дыскрымінацыі. Я чалавек працавіты і маю шэраг узнагарод і ўдзячнасцяў ад кіраўніцтва раённага і абласнога ўзроўню за сваю працу, а са мной вось так узялі і паступілі”.

Дарэчы, у 2007 годзе Мікалай Расюк ужо балатаваўся ў мясцовыя Саветы дэпутатаў. Тады, па афіцыйных звестках, ён набраў 32% галасоў выбаршчыкаў, што было адным з самых высокіх афіцыйных вынікаў прадстаўніка ад апазіцыі ў Беларусі. Пазней, у 2008 г., Мікалай балатаваўся ў Палату прадстаўнікоў, дзе ягоным апанентам выступіў кандыдат ад улады Яўген Мельнікаў. У тым жа годзе, па афіцыйных звестках, актывіст набраў каля 20%.